ОХУ-ын ерөнхийлөгч В.Путин өчигдөр Оросын стратегийн хөгжил хийгээд үндэсний төслийн хуралд оролцжээ. Тэрбээр энэ хуралд илтгэл тавихдаа "Зарим орнууд Оросын хөгжлийг хязгаарлахын төлөө гадаад орнуудаас дэвшилтэт технологи олохыг хориглож байгаа ч бид өөрсдөө шинэ шийдлүүдийг хайж, өндөр технологийг хүчээ төвлөрүүлэн хөгжүүлнэ" хэмээн мэдэгджээ.
В.Путин хэлсэн үгнүүдээс онцолвол "Зарим орнууд ОХУ-ыг гадаадаас дэвшилтэд технологийн бүтээгдэхүүн авахыг хориглож байна. Энэ нь Орост асар том сорилт авчирч байна, гэхдээ Орос буулт хийх эсвэл ямар нэгэн эмх замбараагүй байдалд орохгүй, хэдэн арван жилээр хойш ухрах байдалд ч хүрэхгүй" гэж хэлснийг ОХУ-ын ерөнхийлөгчийн веб сайт мэдээлжээ.
Мөн " ОХУ цаашид шинэ шийдлүүдийг хайж, одоогийн технологийн нөөцөө үр бүтэмжтэй ашиглан өөрийн орныхоо инновацийн компаниудын хөгжлийг чангатгах болно. ОХУ дэлхий нийтээс тусгаарлагдсан байдалд хөгжиж чадахгүй. Дэвшилтэд технологийн судалгааг нэмэгдүүлэн, дижитал өөрчлөлтийг өргөн хүрээнд нэвтрүүлж, шинжлэх ухаан технологийн компаниуд хурдтай хөгжихөд санхүүгийн дэмжлэг олгож, инженерийн болон мэдээллийн технологийн боловсон хүчнийг бэлтгэх ёстой" гэсэн байна.
