Шатахууны импортын үнэ огцом нэмэгдэж оны өмнө 5000 төгрөг хүрнэ гэдэг мэргэ төлөг биелэлээ олох нь. Орос ах нар нефтийн бүтээгдэхүүнээ багтаах савгүй болсон гэх атлаа хориг хэмжээ улс орнуудаас ч үнэтэй шахам бензинээ нийлүүлж буйг ойлгохоо байв. Шатахууны үнэ нэмэгдэхээр гурил будаанаас эхлээд үсчин, нойл орох үнэ хүртэл нэмэгддэг хойно доо. Нефтийн үнийн өсөлтөөс үүдэн нөгөө гоё хөтөлбөр, төсөл, бүтээн байгуулалтууд нам зогсоно. Хамгийн тод жишээ бол нефтийн үнийн өсөлтөөс үүдэн таван жил гацсан Дарханы зам байна шүү дээ. Энэ мэтчлэн бүхий л хүндрэл Засгийн газрын нуруун дээр ирж амьд үлдэхийн тулд байгаль руугаа дайрна. Үүнийг нь шантааж хийх боломж гэж ойлгосон гарууд жагсаж цуглан тэмцэх биз.
Уг нь шатахууны хомсдлоос гарах боломж гарц бий. 1990 оны эхээр уудаг цай, татдаг тамхигүй болсон Монгол Улс. Энэ үед ашиг орлого бодсон наймаачид дайн тулаантай Уулын Карабахаас шланз шаланзаар цай оруулаад үнэ ханшийг нь навс унагаж байв шүү. Хэрвээ Засгийн газар сонгуулиар ашигладаг, мөнгийг авдаг шатахууны эзэдээ бус нийт ард түмнээ бодоод тусгай зөвшөөрлөө цуцлах аваас овсгоотой залуус хаанаас ч хамаагүй шатахуун олоод ирнэ. Оросоос Хятад руу шатахуун зараад явж буй залуус ч бий. Тэдэнд боломж олгох аваас дэлхийн бүхий улсаас шатахуун (Хар зах гэж буй) зөөгөөд асуудал болгоно. Чанартай чанаргүйг нь төр өөрөө хянах биз дээ. Байдал төсөөллөснөөс илүү хүнд байх (дефолт зарлах) магадлалтай тул Засгийн газар дахиад л хятад, Дэлхийн банк, ОУВС-гаа царайчилна даа. Нүхнээс татаад өгөөч гээд л...