АНУ-ын Орегин мужийн Южин хотод болж буй хөнгөн атлетикийн ДАШТ-д үргэлжилсээр байна. ДАШТ-ий марафон гүйлтийн эрэгтэйчүүдийн төрөлд өчигдөр болж, Монголын 3 тамирчин оролцсоноос гавьяат тамирчин Б.Сэр-Од 2:11:39 амжилтаар 26 дугаар байр, ОУХМ Ц.Бямбажав 2:14:44 амжилтаар 42 дугаар байрт тус тус орлоо.
Харин ОУХМ Д.Гантулга 30 гаруй км туулсны дараа замаас гарч, барианд орж чадсангүй. Цаг агаар үүлэрхэг , харьцангуй сэрүүвтэр, цельсийн 16 градус дулаан, 79 хувийн чийгшилтэй байсан ч 33 орны 63 тамирчин гараанаас гарч 54 нь барианд оржээ.
2003 оноос хойш олимп болон ДАШТ-д оролцох эрхийн норматив болох хатуу болзлыг биелүүлэн оролцож байгаа Монголын марафонч Б.Сэр-Одыг олон улсын мэдээллээр онцолжээ. Манай улсаас эмэгтэй марафонд Б.Мөнхзаяа уралдана. Спортын хатан хатан хэмээн нэрлэгддэг 18дахь удаагийн хөнгөн атлетикийн ДАШТ-д 192 орны 1928 тамирчин эрхээ аван оролцож байна.
