Тулгар төрийн 2231 жил, Их Монгол Улс байгуулагдсаны 816 жил, Ардын хувьсгалын 100, 101 жилийн ой, “Монгол Улсын Төрийн далбааны өдөр”-т зориулсан Цэргийн ёслол, хүндэтгэлийн ажиллагаа өнөөдөр ёслол төгөлдөр их жанжин Д.Сүхбаатарын талбайд боллоо.
Уг Цэргийн ёслол, хүндэтгэлийн ажиллагаанд Монгол Улсын Ерөнхийлөгч, Зэвсэгт хүчний Ерөнхий командлагч Ухнаагийн Хүрэлсүх, Монгол Улсын Их Хурлын дарга Гомбожавын Занданшатар, Монгол Улсын Ерөнхий сайд Лувсаннамсрайн Оюун-Эрдэнэ, Монгол Улсын Их хурлын гишүүд, Засгийн газрын гишүүд, Монгол Улсад суугаа дипломат төлөөлөгчийн газруудын хүндэт зочид, Монгол Улсын Батлан хамгаалах яам, ЗХЖШ, ХЗЦК, АЦК, ТХЦК, ҮБХИС, ХХЕГ, ДЦ, ОБЕГ, ЦЕГ, ТТХГ, ШШГЕГ, Дотоод хэргийн Их сургуулийн удирдлага, бие бүрэлдэхүүн, Төрийн хүндэт харуул, ахмад дайчид, нийслэлийн ард иргэд оролцож байна. Цэргийн ёслолын жагсаалыг ЗХЖШ-ын нэгдүгээр орлогч дарга, Улаанбаатар цэргийн хүрээний дарга, бригадын генерал Сүнрэвийн Ганбямба командалсан бөгөөд Жанжин тугийг ёслолын жагсаалд залснаар эл арга хэмжээ ёслол төгөлдөр эхэллээ.
Зэвсэгт хүчний Жанжин туг нь Монгол Улсын тусгаар тогтнол, эрх чөлөөний бэлгэ тэмдэг, Зэвсэгт хүчний нийт бие бүрэлдэхүүний сүслэн дээдлэх ариун шүтээн, оройн сүлд, золбоо хийморийн бэлгэдэл, Зэвсэгт хүчний дайчин уламжлал, эх орноо хамгаалах ариун үүрэг, цэргийн нэр төр, алдар гавьяаны илэрхийлэл байдаг юм. Энэ жилийн Жанжин тугийн чиглүүлэгчээр ЗХЖШ-ын Ажиллагааны удирдлагын газрын дарга, бригадын генерал Сүрэнхорлоогийн Дашзэвэг, тугчаар Зэвсэгт хүчний Хяналт-шинжилгээ үнэлгээний газрын дарга, хурандаа Жаргалсайханы Өсөхбаяр, туг хамгаалагчаар ЗХЖШ-ын Захиргааны удирдлагын хэлтсийн дарга хурандаа Дэмбэрэлийн Номт, Материал техникийн газрын хэлтсийн дарга, хурандаа Сүхээгийн Баяр-Очир нар ажиллав.
Үргэлжлүүлэн цэргийн ёслолын жагсаал командлагч, ЗХЖШ-ын нэгдүгээр орлогч дарга, Улаанбаатар цэргийн хүрээний дарга, бригадын генерал Сүнрэвийн Ганбямба Монгол Улсын Засгийн газрын гишүүн, Батлан хамгаалахын сайд дэслэгч генерал Гүрсэдийн Сайханбаярт илтгэл өглөө. Илтгэлийн дараа Батлан хамгаалахын сайд дэслэгч генерал Г.Сайханбаяр цэргийн ёслолын жагсаалд оролцож буй алба хаагчдад Ардын хувьсгалын 100, 101 жилийн тэгш ой, “Монгол Улсын Төрийн далбааны өдөр”-ийн дайчин цогтой мэндийн хүргэж, Монгол Улсын Ерөнхийлөгч, Зэвсэгт хүчний Ерөнхий командлагч Ухнаагийн Хүрэлсүхэд Цэргийн ёслолын жагсаал эхлэхэд бэлэн болсныг илтгэлээ.
Энэ жилийн хувьд Ардын хувьсгалын 100, 101 жилийн тэгш ой тохиож байгаа бөгөөд “Монгол Улсын Төрийн далбааны өдөр”-т зориулсан цэргийн ёслолын жагсаалд Батлан хамгаалах яам, Төрийн цэргийн болон хууль сахиулах байгууллага, сургуулиудын 14 байгууллагын 4000 гаруй алба хаагчдаас гадна морин цэрэг, 300 гаруй дугуйт болон хүнд гинжит техник Цэргийн ёслолын жагсаалд оролцлоо.
Шивээ Хиагтын уухайгаар шинэ цагийн түүхийг эхлүүлж, тусгаар тогтнол, эрх чөлөөгөө зарлан тунхагласан дайчин эрс болох Ардын журамт цэргийн жагсаал, 1939 оны Халхын голын байлдаан, 1945 оны Чөлөөлөх дайнд хоёр дайны хүндийг мөрлөн үүрч, хорвоогийн элгэн дээр Монгол цэргийн ялалтыг дархалсан дайчин эрсийн жагсаал, нөгөө талдаа орчин цагийн Зэвсэгт хүчний дайчин эрсийн төлөөллийг илэрхийлсэн жавхаа төгөлдөр эрсийн жагсаалаас гадна ОХУ-д зохион байгуулагдсан Аугаа их Эх орны дайны ялалтын 75 жилийн ойн цэргийн ёслолын жагсаалд Монгол Улсын Зэвсэгт хүчнийг төлөөлөн оролцсон шилдэг дайчдын жагсаал энэ жилийн цэргийн ёслолын жагсаалд сүр нэмж байлаа. Мөн Монгол цэргийн алдар гавьяаг дэлхий дахинд цуурайтуулан мөнхөлж, хүлгийн туурайгаар хөвчин дэлхийг туулсан эртний дайчин баатруудын морьт жагсаал ч цэргийн ёслолын жагсаалын онцлог байлаа. Тодруулбал, Магнаг үсэгтэй тугаа мандуулан, их хувьсгалын уухайгаар эрх чөлөө, тусгаар тогтнолоо тэмцэн олж, энх цагийн түүхийг бичсэн хатан зоригт баатрууд, Ардын журамт цэргийн морьт жагсаал, морьт хорооны дайчин эрсийн жагсаалууд байв.
Түүнчлэн Монгол Улсын Зэвсэгт хүчний техникийн инженерүүдийн зохион бүтээсэн анхны автомашинууд болох “Хилэнцэт” тусгай ажиллагааны бартаат замын машин, “Чоно-1” бүлгийн байлдааны машин, “Мазаалай” хөнгөн хуягласан автомашинууд болон “Форд-Ф550” тусгай зориулалтын хуягласан автомашин, “Донг фэнг-EQ2050” тусгай зориулалтын хөнгөн хуягласан суудлын автомашин, “Ивеко NJ2050” тусгай зориулалтын бүлгийн автомашин олны нүдийг хужирлаж байсан юм.
Мөн МИ-8, МИ-171Е нисдэг тэргүүдээс гадна “Ёл-1, 2” загварын нисгэгчгүй нисэх төхөөрөмж цэргийн ёслолын жагсаалыг чимэв. Эдгээр төхөөрөмжүүд нь мөн Монгол Улсын Зэвсэгт хүчний Агаарын цэргийн нисэхийн инженерүүд зохион бүтээсэн төхөөрөмж бөгөөд агаараас орон зайн тандалт судалгаа, тагнуул явуулах үүрэгтэй. Мөн 300-350 метрийн урттай зурвас ашиглан хөөрөх, буух боломжтойн дээр дулааны камертай, өдөр шөнийн аль ч цагт өндөр чанарын дүрс бичлэгийн мэдээлэл дамжуулах чадамжтай ажээ.
Ийнхүү жанжин Д.Сүхбаатарын талбайд зохион байгуулагдсан “Монгол Улсын Төрийн далбааны өдөр”-т зориулсан Цэргийн ёслол, хүндэтгэлийн ажиллагаа цэрэг эрсийн цог золбоог илтгэн амжилттай зохион байгуулагдаж өндөрлөлөө гэж Соёмбо редакц мэдээллээ.
