ГССҮТ - д хэд хоног хэвтэж илааршсан гарлаа. Шагайныхаа хоёр савхан ясыг хугалсан оноштой. Хөдөөний хүн хотод хонинд төөрсөн хурга шиг амьтан хаалгаар нь орсон. Гэвч миний айдас эргэлзээ хүлээн авах өрөөнөөс эхлээд замхран одов. Ширүүн дүү зантай ч өөртөө бүрэн итгэлтэй залуухан эмч хүү дор нь үзээд зургаа авуулаад ир гэв. Рентген зураг хараад "за ах шагайны хоёр савхан яс хугарч, хагалгаанд орно оо. Одоо шууд хэвтэнэ " гэж тушаалаа. Хэ ийм амархан хэвтүүлчихдэг юм байхдаа хэмээн баярлаж байгаа намайг ээ. Цахим ертөнцөөр нэг эмч,эмнэлэг хоёрыг муулсан постонд автсан би тэгэлгүй ч яалтай.
Тэр дороо тэргэнцэртэй намайг сайхан ааштай сувилагч бүсгүй 5 давхар рүү лифтээр зөөж 2 ноймрын платад хэвтүүллээ. Өрөөндөө зургуулаа. Дандаа л хугарсан хавдсан нөхдүүд. Оройхон ахин нэгэн залуу эмч орж ирээд "за маргааш хагалгаанд орно" бэлдээрэй гэв. Төдхөн нэгэн сувилагч түрж аваачаад нэг өрөөнд оруулаад шалба угаачихлаа. Ингээд глизм тавиулаад, дусал, тариа хийлгээд хэвтэж амрав. Өглөө нээх олон эмч нар өрөө бүрээр орж ирж өвчтөнүүдээ үзэж шалгах юм. Том 2 докторууд л бололтой. Биднийг хариуцсан Амгаасэд хэмээх залуу энэ хүн ийм, тэр тийм хэмээн танилцуулах юм. Ингээд 11 цаг гэхэд намайг хагалгаанд бэлдэн түрээд одов оо.
Хагалгааны өрөөнд дандаа залуус. Бүр нэг итгэл төрөхгүй байхыг аргаггүй шижигнэсэн доовторууд. Миний муу хагалгаа бол тэдэнд зүгээр зэлгээн цай бололтой. "За ах айх сандрах юм байхгүй, өвдөхгүй ээ" л гэнэ. 20 хон минутад л дужигнуулаад хаячихлаа. Буцаад өрөөндөө ирлээ.өвдөлт ч мэдэрсэнгүй. Ажилдаа гаршсан мундаг залуус юм аа. Удалгүй сувилагч охин ирж норкоз гараад өвдөлт мэдрэгдвэл хэлээрэй гээд гарч одов. Өрөөнийхөө үйлчилж байгаа сувилагч нарын энэ 5 хоногт ажиглав. Уурлаж уцаарласан,хар яр хийсэн нэг ч хүн харсангүй. Найрсаг, хүнлэг хүний төлөө сэтгэл үнэртсэн үнэхээр бахархам хамт олон юм аа.
Манай өрөөнд "нэг хатуу гар" байх. Удаан хэвтсэн бололтой. Дунд чөмөгний хагалгаанд орсон. Ар гэрийн эргэлт бага, сахиургүй нөхөр. Уураа хүрэхээр өнөөдүүлээ загначихдаг. Гэвч нөгөөдүүл нь их сайн юм аа. Инээд алдаж орж ирээд л нөгөө нөхрийг тариад л явчихна. Их анхаарал хандуулах юм аа. Цаад нөхөр мэдэж байгаа ч юм уу бүү мэд.
Хамгийн аймаар газар бол Гэмтэл юм. Мөн ч хүнд хүмүүс ирэх юм, мөн ч их ачаалалтай юм. Мэс засал орж байхад л үд нь болж хоол нь ирнэ, хөөрхий хэдэн эмч хөлсөө урсгаад л мэс заслаа хийж бгаа харагдсан. Тэдэнд хоолыг идэх биш "уух" л цаг гардаг бололтой. Ходоод гэдэс нь хөөрхий гэмээр.
Ай цагаан халаадтай баатрууд минь. Эрх мэдэлтэйхэн байсан бол та нарт хамгийн өндөр цалинг хамгийн хангалуун хангамж өгөхсөн.
Гэмтлийн эмнэлгийн удирдлага мөн сайн ажилладаг нь эмч нарын хариуцлага,үйлдлээр нь харагдаж байна лээ. Тэр их ачаалал дунд байгаа хэдэн эмч сувилагч нарт ер нь ар гэрийн амьдрал гэж байдаг юм уу л гэмээр.
Миний хагалгааны үндсэн төлбөр бол сая гаран болох юм байна лээ.нд хөнгөлөөд ор хоногтойгоо 200 гаруй болсон. Сэтгэл ханамж күүл байхад хоёр зуун цаас бол ничево.
Эрүүл мэндийн салбартаа эрс шинэчлэл хийх болжээ. Энэ сайхан залуус дэлхийн жишгийн цалинтай, дэлхийн жишгийн тоног төхөөрөмжтэй байх ёстой. Тэргэнцэр гэхэд л дутуу гуцуухан,хэдэн өрөө дундаа ганц тэргэнцэртэй харагдсан. Тэнд ажиллаж байгаа эмч сувилагчдын харьцаа бол үнэхээр мундаг.
Эмчлэгч эмч Амгаасэд, Оргилбаяр болон сэтгэлтэй, хүнлэг, сайхан ааштай хөөрхөн сувилагч нартаа баярлалаа. Цагаан халаадтай баатрууддаа баярлалаа.
ГССҮТ- ийн 2 ноймрын хугархай хөлт, шүлэгч, сэтгүүлч гуншинт Н.Мөнхсайхан мэхийв. 2022.07.05. Их хүрээ.
Har Has MC
