Монгол Улсын Ерөнхийлөгчийн ивээл дор “Хилийн чанад дахь монголчуудын зөвлөл" нийгэмд үйлчлэх ТББ-ын IV чуулган ГХЯ-нд болж байна. Чуулганыг хилийн чанад дахь монголчуудын нийгэм, эрхийн асуудал, гадаадаас эх орондоо хөрөнгө оруулах иргэдийн уулзалт, хэл, соёлын багш нарын уулзалт гэсэн 4 салбар хуралдаанаар зохион байгуулж байна. Салбар хуралдаан бүрээс зөвлөмж гарган, маргааш Төрийн ордонд мөн Монгол Улсын Ерөнхийлөгчийн ивээл дор болох Хилийн чанад дахь монгол иргэдийн нэгдсэн чуулганд танилцуулах талаар “Хилийн чанад дахь монголчуудын зөвлөл" нийгэмд үйлчлэх ТББ-ын захирал Н.Номун-Эрдэнэ тодотгов.
Тэрээр, хилийн чанад дахь монголчуудын уулзалт анх 2014 онд Гадаад харилцааны сайдын санаачилгаар болж байсныг онцолж, түүнээс хойш 2 жилд тутамд уулзалт, хэлэлцүүлгийг зохион байгуулж гадаад дахь монгол иргэдийн нийгэм, тэдний хүүхдүүдийн хэл, соёлын асуудлыг, түүнчлэн Монгол Улсыг гадаадад сурталчилах үйл ажиллагааг иргэд, төр, засаг, ТББ-уудын хамтын оролцоотой хийж ирснийг мэдээллээ. Энэ бүхнийг дүгнэн хэлэлцэж, баталгаажуулж, ярилцаж байдаг нь Монгол Улсын төрийн гадаад бодлогын нэг салшгүй хэсэг юм гэдгийг тэмдэглэж байна.
“Хилийн чанад дахь монголчуудын зөвлөл" ТББ нь боловрол, соёл, нийгмийн зэрэг үндсэн 6 хороотой аж. Хороод үйл ажиллагааны тайлан, дүгнэлтээ өнөөдөр ГХЯ-нд чуулгаанаараа хэлэлцэв. Жишээ нь, Боловсролын хорооны тайланг тус хорооны дарга, монгол хэл, уран зохиолын багш, Герман улсад ажиллаж амьдарч буй Н.Оюунтүлхүүр тавьсан юм.
Тэрбээр, хилийн чанадад “Би монгол хүн” цахим сургалтыг үүсгэн зохион байгуулж буй талаар танилцуулсан юм. Өнөөдөр дэлхийн 20 гаруй улсад Монгол хэл, соёлын 60 гаруй сургалт төв байгуулагдан үйл ажиллагаа явуулж буйг тэрээр дуулгав.
