Баян-Өлгийн аймгийн иргэд олон нийтийн сүлжээнд БСШУ-ны сайд Л.Энх-Амгаланд хандаж элдвээр доромжилж бичиж, амь насанд нь заналхийлсэн гэх хэргийг Тагнуулын байгууллагаас шалгаж эхэлсэн тухай мэдээлэл өнгөрсөн долоо хоногийн сүүлээр Асу.мн сайтаар мэдээлэгдсэн.
Уг мэдээлэлд "Казак болон Баян-Өлгий аймагтай холбоотой газар нутаг устай холбоотой мэдээллийг хэдэн хоногийн өмнө сайд өөрийн цахим хуудсандаа бичсэн юм байна. Үүнийг нь харсан Баян-Өлгийчүүд буюу казах үндэстэнгүүд эгдүүцэж янз бүрээр цахим сүлжээнд бичиж, сайдыг Алтай таван богдод ирж л таараа тэгэхээр нь хоёр нүдийг нь ухаж явуулна. Угаасаа ирсэн халхуудын хоёр нүдийг нэг нэгээр нь ухна. Монгол удахгүй Казахуудын эрхшээлд орж газар нутгаа алдана гэсэн утгатай зүйл бичсэн байсан бөгөөд үүнийг нь Тагнуулын байгууллагаас шалгаж, ямар зорилготой ийм мэдээлэл олон нийтийн сүлжээнд бичиж тавьсан эсэхийг тодруулж, бичсэн хүмүүсээс нь тайлбар мэдүүлэг авч байгаа гэдгийг эх сурвалж хэлж байна. Харин энэ талаар салбарын сайдаас тодруулах гэсэн боловч гар утас нь холбогдсонгүй" хэмээжээ.
Тэгвэл энэхүү мэдээллийг энэ амралтын өдөр БШУСайд Л.Энх-Амгалан үгүйсгэсэн байна. Тэрбээр "Худлаа мэдээлэл байна. Сошиал сүлжээнд хэт итгэх маш хортой. Надад нэг ч Казах хүнээс ямар нэг заналхийлэл ирээгүй ээ. Монгол хэлийг 1 дүгээр ангиас заана гэдэг нь Казах хүүхдүүдийг гадуурхсан зүйл огт байхгүй.
Монгол улсын иргэд Монгол хэл сурах/сургах үүргээ биелүүлэх үүрэгтэй, төр бодлогоо хэрэгжүүлээгүй явж ирснээс олон Казах хүүхэд залуус бүх шатны сургууль, их сургуульд элсэн орох, тэтгэлэг авах боломж монгол хэлний шалгалт давахгүй шалтгаанаар хязгаарлагдмал байгаа.
Төрийн албанд энэ шалтгаанаар өрсөлдөх боломжгүй чадварлаг казак залуус байна. Монгол Улсын бүх иргэд тэгш боловсрох, эрхтэй. Ингэж л байж хязгаар Баян-Өлгийд маань хөгжил цэцэглэлт ирнэ гэж би итгэдэг. Өндөр боловсролтой, мэргэжлийн ур чадвартай түмэн олондоо хүндлэгдсэн казак залуусийн шинэ үе гарч ирэх цаг нь болсон..." гэжээ.
