АТГ-аас төрийн өндөр албан тушаалтнууд болон төрийн албан хаагчдын 2021 оны Хөрөнгө орлогын мэдүүлгийг эмхэтгэж, цахим сүлжээндээ байршуулжээ. Ерөнхийлөгч, УИХ-ын дарга, Ерөнхий сайд гурав ХОМ-ээ хэрхэн мэдүүлснийг харья.
Ерөнхийлөгч У.Хүрэлсүх:
Өөрийнх нь орлого 169 сая төгрөг бол гэр бүлийн орлого тэг гэж мэдүүлжээ. 2020 оныхоос өөрийнх нь орлого 16 саяар буурсан байна. Нийтийн орон сууц, зуслангийн байшингаа нийт 162 саяар, өөрийн хобби болсон мотоцикл Harley Davidson-1, Lexus 570- 1, Mercedes Benz ML320 машинаа 284 саяар үнэлсэн байна.1.5 га газраа 100 сая төгрөгөөр үнэлсэн бол “Илт хан” ХХК-ийн 58 хувийг эзэмшдэг, “Эрдэнэс Тавантолгой”-н 1072 хувьцааг эзэмшдэг гэжээ. Харин түүний 1 тэрбум 694 сая төгрөгийн хадгаламж 2019 оноос хойш огт өсч, буураагүй хэвээр байгаа аж.
УИХ-ын дарга Г.Занданшатар:
Өөрийнх орлого 2020 онд 506 сая байсан бол 2021 онд 60 сая болж, найм дахин буурсан бол гэр бүлийнх нь орлого 85 саяас 217 сая болж, гурав дахин өссөн байна.
Нийтийн орон сууц 1, зуслангийн байшин 1, үйлчилгээний зориулалттай 1 үл хөдлөх хөрөнгөө 1 тэрбум 175 сая төгрөгөөр үнэлсэн байна. Nissan Murano машинаа 80 сая гэж мэдүүлжээ. 49 сая төгрөгийн газартай, 130 сая төгрөгийн үнэт эдлэлтэй, 115 сая төгрөгийн хадгаламжтай бол 200 сая төгрөгийн зээл өнгөрсөн жил тавьсан байна.
Мөн "Нэгүн кашмер" ХХК, "Монитор консалтинг групп" ХХК, "Монголиан Силикон Валлей" ХХК-иудад хувь эзэмшдэг.
Монгол Улсын Ерөнхий сайд Л.Оюун-Эрдэнэ:
Өөрийн орлого нь 234 сая төгрөг, гэр бүлийн орлого 14 сая төгрөг гэж мэдүүлжээ. 291 сая төгрөгийн үнэлгээтэй нэг нийтийн орон сууцтай бол 30 сая төгрөгөөр үнэлэгдэх Toyota, Highlander машинтай. Харин 177 ямаа, 138 хонь, 75 үхэр, 30 адуу, хурдан удмын 5 адуугаа 187 сая төгрөгөөр үнэлжээ. 67 сая төгрөгийн үнэт эдлэл, 93 саяын хадгаламжтай.
“Херо энтэртайнмент групп” ХХК-ийн 50 хувь, “Хүлэг контент” ХХК-ийг 100 хувь, 2 тусгай эрх эзэмшдэг байна.