Цагдаагийн байгууллагаас 2021 онд 192 хүнд холбогдох 483 хэрэгт хэрэг бүртгэлт мөрдөн байцаалтын ажиллагаа явуулсан нь өмнөх оны мөн үеэс 456 хэргээр буюу 94.4 хувиар өссөн үзүүлэлт байна.
2022 оны нэгдүгээр улиралд 34 хүнд холбогдох 93 хэрэг бүртгэгдэж, өнгөрсөн оны мөн үеэс 38.6 хувиар буурчээ.
Мөн Эрүүгийн цагдаагийн албаны Эдийн засгийн гэмт хэрэгтэй тэмцэх газраас банк, санхүүгийн байгууллагуудтай хамтран хийсэн судалгаагаар өдөрт дунджаар 1,000 гаруй харилцагчийн дансыг ашиглан, 2,000 орчим мөрийтэй тоглоомтой холбоотой гүйлгээ хийгдэж байна гэх дүгнэлт гарсан байна.
Улсын ерөнхий прокурорын газар, Монголбанк, Харилцаа холбооны зохицуулах хороо, Цагдаагийн ерөнхий газар зэрэг төрийн байгууллагууд арилжааны банкны данс ашиглан цахим орчинд мөрийтэй тоглоом зохион байгуулж байгаа болон хэсэг бүлгээрээ нэгдэн мөрийтэй тоглож байгаа гэмт хэргийг таслан зогсоохоор хамтран ажиллаж байгаа гэж ЦЕГ-ын Хэвлэл мэдээллийн төвөөс мэдээллээ.
Одоогоор цахимаар мөрийтэй тоглоом зохион байгуулсан 43 сайтын хандах эрхийг хязгаарлаж, тухайн сайтуудад байршуулан мөнгө татан төвлөрүүлэх, тараалт хийх зэргээр ашиглаж байсан 25 дансанд хязгаарлалт тогтоон их хэмжээний мөнгийг битүүмжилж, зохион байгуулагч нарыг тогтоон мөрдөн шалгаж байгаа аж.
Мөрийтэй тоглоом зохион байгуулах, тоглох үйлдлийг зөрчил гэж үзэн Зөрчлийн тухай хуулиар хариуцлага хүлээлгэж байсан бол 2020 оны нэгдүгээр сарын 10-ны өдрөөс Эрүүгийн хуулийн 20.17 дугаар зүйлд зааснаар гэмт хэрэгт тооцон эрүүгийн хариуцлага хүлээлгэх заалттай болсон юм.
Харин мөрийтэй тоглоом тоглох үйлдэлд Зөрчлийн тухай хуулийн 5.7 дугаар зүйлд зааснаар хариуцлага хүлээлгэхээр хуульчилсан байдаг.
Иймд иргэд цахим мөрийтэй тоглоом зохион байгуулж буй сайт болон энэ төрлийн гэмт хэргийн талаарх мэдээллийг Цагдаагийн байгууллагын 51261749 тусгай дугаарт ирүүлэхийг зөвлөлөө. Мэдээлэл өгсөн иргэн, байгууллагын нууцлалыг цагдаагийн байгууллага хангаж, хамтран ажиллах юм.
