Өнөөдөр /2022.04.19/ Дэлхийн банкны төлөөллөөс мэдээлэл хийж, Монгол Улсын эдийн засгийн нөхцөл байдалд хийсэн судалгааны тайланг танилцууллаа. Энэ үеэр 2022 оны эдийн засгийн өсөлтийг 2.5 хувь гэж тооцоолж буйгаа мэдэгдсэн.
Тэгвэл Монгол Улсын гадаад өрийн асуудлаар Дэлхийн банкны Улсын салбарын ахлах мэргэжилтэн Д.Бадамчимэг "2023 онд Засгийн газар бондын төлөлт хийж эхлэх хуваарьтай байгаа. Хэрэв Хөгжлийн банкны зээл бүрэн төлөгдөхгүй бол санхүүжилт босгосон бондын төлбөрөө төлж чадахгүйд хүрнэ.
Хэрэв ингэвэл Монгол Улсын Засгийн газар олон улсын зах зээлд дахин бонд гаргах боломжгүй болно. Дахин бонд босгох боломжгүй бол Засгийн газар Хөгжлийн банкны өрийг төлж таарна. Ингэвэл мөнгөний тогтвортой байдал улам бүр алдагдана. Олон улсын нөхцөл байдлыг авч үзэхэд 2023 онд эргэн төлөгдөх бондуудыг дахин санхүүжүүлэхэд хүндрэлтэй болно" гэж ярьсан байна.
