Шүүхийн шийдвэрээр барилдах эрх нь сэргээд байсан Улсын арслан Э.Оюунболд өнгөрсөн ням гарагт наадмын сорилго барилдаандаа зодоглож, үзүүрлэсэн. Барилдааны дараа хэвлэлд өгсөн ярилцлагадаа :
"Миний аав бас үндэсний бөхөөр барилддаг хүн байсан, тэнгэр лүү яваад цөөхөн хонож байна.
Миний хүү хэзээ барилдах бол гэж хүлээж байсан, өнгөрөөд 30 гаруй хонож байхад нь барилдлаа. Нэг бодлын сайхан, нэг бодлын их муухай байна. Өнгөрсөн хугацаанд сэтгэл санаа, ар гэр, хөрөнгө мөнгөөрөө маш их хохирлоо. Монголын хууль хяналтын байгууллагууд Допингын холбоог сайн шалгаасай, ганцхан хүний хувийн байгууллага болсон мэт л санагдаж байна. Үнэхээр хар хэл ам гэж байдаг юм байна. Анх би бөхийн спортыг сонирхож эхлээд аавыгаа дагаад наадам хэсэж байхдаа эр хүний дээд нь бөх байдаг юм байна гэж бодож байлаа. Аавыгаа алдсанаас хойш би үндэсний бөхийн спортыг сонгосондоо харамсаж байна. Сонгоогүй бол элэг бүтэн ч байх байсан юм бил үү. Одоо нэг л эзгүй болчихоод л явж байна. Олон улсын Арбитрын шүүхэд хандаж, Допинг хэрэглээгүй гэсэн шийдвэр гарлаа. Ингээд би шүүхийн шийдвэрээр барилдлаа. Арбитрын шүүх гэж байгаад маш их баяртай байна. Цаашдаа хичээж барилдах болно. Гэхдээ энэ мэтээр цолоо дээрэмдүүлээд байвал надад түрүүлэх сонирхол алга." хэмээн ярьжээ.
