Өнөөдөр Сүхбаатарын талбайд залуус дахин эсэргүүцлээ илэрхийлж эхэллээ. Эдгээр залуус өмнөх жагсаалын шаардлагуудад Засгийн газраас ор нэр төдий, аргацаасан шийдвэрүүд гарч байгааг эсэргүүцэж ийнхүү дахин суулт хийж байгаа ажээ.
Энэ сарын эхээр Сүхбаатарын талбайд залуу үеийнхэн цуглан “Ажлаа хий” уриан дор нэгдэн Засгийн газарт шаардлага хүргүүлэн жагсаал зохион байгуулсан билээ. Уг тайван жагсаалаас 15 заалт бүхий шаардлагыг Засгийн газарт хүргүүлсэн билээ.
- Авлига, албан тушаалын хуулийн 22.1 дүгээр заалтыг шинэчлэх,
- Үйлдвэрлэлийг дэмжих, зээлийн бодлогыг иргэдэд тэгш хүртээмжтэй хуваарилах,
- Бизнес эрхлэгчдийг дэмжих, Хөгжлийн банкны асуудлыг шийдэх,
- Олон улсын төлбөр тооцооны системийг нэвтрүүлэх,
- Дарга нарын хангамжийг зогсоох,
- Үнийн өсөлтөд арга хэмжээ авах
- Татварын тухай хуульд өөрчлөлт оруулах зэрэг нийт 15 шаардлага тавьсан байдаг.
Засгийн тэргүүн Л.Оюун-Эрдэнэ жагсаалд оролцож буй залуустай уулзахдаа тодорхой хэмжээний саналууд хэлж, ээлж дараалан арга хэмжээ авахаа амалсан. Мөн ажлын хэсэг байгуулж, түүндээ жагсаалд оролцож буй залуусаас сонгож оруулсан юм. Ерөнхийлөгч У.Хүрэлсүх Засгийн газрын гишүүдтэй уулзахдаа шаардлагатай арга хэмжээг яаралтай авахыг сануулсан. Иргэдийн шаардлагын дагуу Засгийн газар дөрөвдүгээр сарын 8-нд ээлжит бусаар хуралдсан ба нийт 15 зүйл бүхий шаардлагаас ЗГ-ын эрх мэдлийн хүрээнд дангаар шийдвэрлэх боломжтой 11 зүйлийг хэлэлцэн шийдвэрлэснээ мэдэгдсэн билээ.
Гэвч одоогоор гарт баригдсан ажлууд байхгүй байгаа бөгөөд улс орны эдийн засаг улам бүр доройтон, дундаж болон дунджаас доогуур орлоготой иргэдийн амьдрал уналтад орж байгаатай холбогдуулан эдгээр залуус суулт хийж эхэллээ. Одоогийн байдлаар Ерөнхий сайд Л.Оюун-Эрдэнийн амлалтаас амьдрал хэрэгжиж эхэлсэн ганц ч шийдвэр алга. Үнийн өсөлтийг хязгаарлах хүссэн боловч 1650 төгрөг байсан талх 1900 болсоноос өөр өөрчлөлт алга байна. Жагсаал болоод 12 хоног болж буй боловч Л.Оюун-Эрдэнийн толгойлсон Засаг иргэдэд өгсөн амлалтаа биелүүлэх чадамж үгүй болох нь бараг тодорхой болж буй бололтой. Энэ байдлаараа залуусын шаардлагыг үл тоомсорловол түүний Засгийн газрыг огцруулах гэж залуус хэдэн мянгаараа дахин Сүхбаатар жанжны талбайг зорих нь ойлгомжтой бизээ.
