Украины Ерөнхийлөгч Володимир Зеленский Оросын зэвсэгт хүчин Донбасс руу довтолж эхэлсэн талаар өнгөрсөн шөнө мэдээлэв. Тэрбээр "Оросын зэвсэгт хүчин эртнээс бэлдэж ирсэн Донбассын тулаанаа эхлүүллээ. Оросын арми Донбасст цэргээ төвлөрүүлээд байна. Бид өөрсдийгөө хамгаалж, тэмцэх болно. Бид тэдэнд Украинтай холбоотой юу ч өгөхгүй" хэмээн өчигдөр шөнө хийсэн мэдэгдэлдээ хэлжээ. Тэрээр цааш нь "Украины дорно болон өмнөд хэсэгт Оросын цэрэг сүүлийн үед илүү бодлоготойгоор халдах гэж оролдож байна. Манай улсын батлан хамгаалах салбарын сул талыг эрэлхийлж, тийшээгээ гол хүчин чадлаа төвлөрүүлэн нэвтрэхийг оролдож байна" гэжээ.
