Афганистанд 6.1 магнитудын хүчтэй газар хөдлөлт болсны улмаас 1000 гаруй хүн амиа алдаж, 1500 гаруй хүн гэмтэж бэртсэн байна. Амиа алдагсдын тоо нэмэгдэх хандлагатай байгаа ажээ. Газар хөдлөлтийн хүч 6.1 магнитуд байсан ба голомт нь Пакистаны хилийн ойролцоох Хост хотоос 46 км-ийн зайд байсан юм. Тус улсын дотоод хэргийн яамны төлөөлөгч Салахуддин Аюби "Зарим тосгодууд алслагдмал уулын бүс нутагт оршдог учраас дэлгэрэнгүй мэдээлэл авахад цаг хугацаа хэрэгтэй байна" гэжээ.
Тус улсын Засгийн газар олон улсын дэмжлэг хүссэн байна. Зүүн өмнөд Пактика муж байгалийн гамшигт хамгийн их нэрвэгдсэн байна. Хүчтэй аадар бороо орж, хүн хүч дутагдаж байгаагаас аврах ажиллагаа удааширч байгаа юм.
Газар хөдлөлтийн голомт нь Афганистаны зүүн өмнөд зүгт Хост хотоос 44 км-ийн зайд 51 км-ийн гүнд болсон гэж Америкийн газар хөдлөлт судлаачид үзэж байна. Аврагчид нурангид дарагдсан хүмүүсийг аврахаар ажиллаж байна. Газар хөдлөлт шөнийн 01:30 цагийн орчимд буюу хүмүүс унтаж байх үеэр болжээ.
