Дотоодын цэргийн 05 дугаар ангийн хугацаат цэргийн алба хаагч 2022.06.16-ны өдөр эмнэлэгт яаралтай түргэн тусламж авахаар ухаангүй хүргэгдэн ирээд, 6-7 цаг үргэлжилсэн хагалгааны дараа нас барсан харамсалтай хэрэг саяхан гарсан. Энэхүү хэргийн талаар Хууль, зүй дотоод хэргийн яамны сайд Х.Нямбаатар дараах тайлбарыг өглөө.
Тэрбээр “Сургалтын төв дээр очсон албан хаагч тангараг өргөснийхөө дараа нас барсан асуудал гарсан. Хууль хяналтын байгууллагаас шалгалт явуулж, шүүх эмнэлгийн шинжээч эмч нар үзлэг, задлан шинжилгээг хийсэн байгаа. Урьдчилсан байдлаар ходоод нь цоорсон гэдэг дүгнэлт гарсан. Тиймээс та бүхэн мэргэжлийн эмч нар буюу шүүх эмнэлгийн шинжилгээ хийсэн багаас асуу. Одоогийн байдлаар эцсийн дүгнэлт гараагүй байна. Тиймээс эмч нарын өмнөөс урьдчилан дүгнэлт хиймээргүй байна. Сэтгүүлчдийг шүүх шинжилгээний төв дээр очиж, шүүх эмнэлгийн дарга болон задлан шинжилгээ хийсэн бүрэлдэхүүнээс асуух боломжоор хангая. Тухайн хэргийн хувьд гадна талдаа хөхөрсөн, шалбарсан ямар нэгэн шарх сорив байхгүй байна. Хэвлэлийнхэн мэргэжлийн байгууллагын өмнөөс өөрсдөө таамаг дэвшүүлж болохгүй. Хүний эрүүл мэндтэй холбоотой асуудал байж болно” хэмээн хэллээ.