Барилгын салбар дахь компаниудын төлөөллүүд болох “Хөгжлийн төлөө барилгачдын нэгдэл” ТББ-ынхан Засгийн газрын ордны баруун талд Ерөнхий сайдад шаардлага хүргүүлэхээр цуглажээ. Тэд Ерөнхий сайдад Сангийн яам, Барилга хот байгуулалтын яам, Боловсролын яамны сайд нартай уулзаж, тулгамдаж буй асуудлуудыг биечлэн танилцуулж, барилгын салбар дахь хүндрэл үүссэн нөхцөл байдлыг хэлэлцэж, тодорхой шийдэлд хүрэх хүсэлтийг хүргүүлж байна. Төрийн ордны баруун талд цугласан салбарын төлөөллүүд дараах байр суурийг илэрхийллээ.
Тодруулбал, тэд Барилга хот байгуулалтын яамны сайд Б.Мөнхбаатар барилгын салбарыг босгодог компаниудын ямар ч төлөөлөлтэй уулзаагүй атлаа Засгийн газарт бидний хөндөж байгаа асуудлуудыг учир дутагдалтай танилцуулсан. Мөн Б.Мөнхбаатар сайд өөрийн түр журмыг батлан хууль бус магадлал хийсэн. Тиймээс барилгын компаниудын эзэд тус магадлалтай санал нийлэхгүй, эсэргүүцэж байгаагаа хэллээ. Түүнчлэн, барилгын материалын үнийн хөөрөгдөл, байгууллагын алдагдал болон улсаас төсөвт өртөгт шингэсэн зардлыг шийдэж өгөхгүй байгаагаас шалтгаалан маш олон барилгын ажил зогссон бөгөөд 2022 оны намар улсын комисст хүлээлгэн өгөх байсан сургууль, цэцэрлэгүүдийн гүйцэтгэл ихэнх нь саатжээ.
