Дотоодын цэргийн 05 дугаар ангийн хугацаат цэргийн алба хаагч, 18 настай Н 2022 оны зургаадугаар сарын 16-нд бие нь муудан, мэс засалд орсон ч харамсалтайгаар нас барсан хэрэг гарсан билээ. Урьдчилсан байдлаар түүний ходоод задарсан нь тогтоогдсон. Цагдаагийн байгууллагаас уг хэргийг ЦЕГ-ын Мөрдөн байцаах албанд шалгаж байгаа ба, шүүх шинжилгээний хариу гараагүй байгаа аж. Шүүх шинжилгээний хариу гармагц үхлийн шалтгаан тодорхой болно ажээ. Мөн Хүний эрхийн Үндэсний комисс уг цэргийн ангид ажиллажээ.
Талийгаачийн ар гэрийн зүгээс үхлийн шалтгааныг цэргийн анги дахь харгислал гэж үзэж, ямар нэгэн хууч өвчин байхгүйг хэвлэл мэдээллийн хэрэгслээр мэдэгдээд байна. Тэгвэл талийгаач урд өдөр нь тангаргийн баяраа хийсэн бөгөөд ар гэрийнхэн нь эргэж очиход ямар нэг зовуурьгүй байсан гэнэ. Талийгаачийн нагац ах Н.Эрхэмбилгүүн:
“Долдугаар сарын 16-ны орой 19.00 цагийн үед цэргийн ангиас холбогдсон. Биднийг очиход дүүг минь эмч үзэж байсан. “Юу болов. Яачихав” гэж асуухад дарга нар нь “Зүгээр ээ. Тангарагийн баяраар хоолы хордлогод орчихсон юм шиг байна” гэсэн.
Цэргийн ангийн эмч нар “Дүү нь зүгээр байгаа. Юм ярьж байгаа” гэсэн. Гэтэл худлаа байсан. Мэс засалд яаралтай орсон ч сэргээгүй. Дүү минь ухаан ороогүй учраас бид уулзаж чадаагүй.
Цэрэгт эв эрүүл татагдаад очсон. Эрүүл мэндийн үзлэг, бүх юмандаа тэнцсэн. Тангарагийн баяраар л ямар нэгэн юм болсон шиг байгаа юм. Дүүг минь зодож, дарамталсны улмаас нас барсан гэж хардаж байна. Бидэнд ийм хардлага байгаа учраас гомдол гаргасан байгаа. Дүүд минь ямар нэгэн ужиг өвчин байгаагүй. Мэс засал хийсэн эмч нь “Ходоод ингэж задрахыг би амьдралдаа хараагүй” гэсэн. Лавлаад асуухад “Мэргэжлийн хүмүүс нарийн шалгаад тогтоох байх” гэнэ лээ. Цагдаагийн мөрдөн шалгах ажиллагаа явагдаж байгаа тул тэр бүр зүйлийг ярьж болохгүй байна” гэлээ.