БОАЖ-ын сайд Б.Бат-Эрдэнэ орон нутгийн Байгаль орчин, аялал жуулчлалын газрын ажилтай танилцаж байна. Тодруулбал, орон нутагт аялал жуулчлалыг хөгжүүлэх боломж, нөхцөлийг эрэлхийлж, орчны бохирдол, хог хаягдлын менежментийн хэрэгжилттэй танилцаж байна. Тэрээр, Хөвсгөл аймагт БОАЖГ, Сав газрын захиргаа, Ойн ангийн албан хаагч, удирдлагатай уулзаж, Хөвсгөл нуураас татан гаргасан "Бор-500" загварын Сүхбаатар хөлөг онгоцны байдалтай танилцлаа. Хөлөг онгоцыг татан гаргасан үеийн байдлыг нь алдагдуулахгүй байх, хамгаалалтад авах, цаашид орон нутгийн аялал жуулчлалд түүхэн дурсгалт бүтээгдэхүүн болгон сурталчлах чиглэлд орон нутгийн удирдлагуудтай санал солилцлоо.
Хөвсгөл аймгийн зүгээс аялал жуулчлалын бүс болгон хөгжүүлэх төлөвлөлт, Хөвсгөл нуурын гүнээс гаргаж амжаагүй байгаа авто машины тойм судалгааг танилцуулж, тус нууранд живсэн автомашины нарийвчилсан судалгаа хийхэд шаардлагатай техник, тоног төхөөрөмжид дэмжлэг хүслээ.
Хөвсгөл аймагт газар хөдлөлтийн давтамж нэмэгдсэнтэй холбоотойгоор жалга сэтэрч голын хажууд амьдарч буй айлууд эрсдэлд орж байна. Мөн Түнэл-Эг үүрийн бэлчир хүртэлх голыг яаралтай цэвэрлэх нөхцөл байдал тулгарчээ. Тиймээс усны сав газарт орсон хог хаягдал, айл өрхийн суурьшлыг шийдэх хэрэгтэй байгаа аж. БОАЖ-ын сайд үргэлжлүүлэн Булган аймагт ажиллаж байна.
