Олон улсын шударга өрсөлдөөний хорооны зөвлөл /Council of the International Fair Play Committee/ Монгол улсын нэрийн өмнөөс Токиогийн олимпын мөнгөн медаль хүртсэн Саид Моллаейд шагнал гардуулжээ. Олон улсын цэвэр шударга өрсөлдөөний төлөө шагнал гардуулах ёслол энэ сарын 17-ны өдөр Унгар улсын нийслэл Будапешт хотод болсон байна. Түүнд уг шагналыг 2019 онд олгох ёстой байсан ч цар тахлын улмаас хоёр жилийн дараа гардуулсан нь энэ.
Энэхүү шагналыг орчин үеийн олимпын хөдөлгөөнийг үндэслэгч Пьер Де Кубертен санаачилсан ба спортын амжилтад нь сөргөөр нөлөөлөхөөр байсан ч цэвэр шударга өрсөлдсөн тамирчинд гардуулдаг ажээ. Саид Моллай 2019 онд Токиод болсон ДАШТ-ий үеэр Ираны эрх баригчдын дарамт шахалтаас болж Израйлын жүдоч Саги Мукитай барилдаж чадаагүй ба иргэншлээ сольж Монгол улсын иргэн болсон билээ.