Монгол Улс Уул уурхайн, металлургийн цогцолбортой болох төлөвлөгөө салхинд хийсч, шүүхийн шатанд очлоо. Учир нь Засгийн газар "Кью Эс Си" ХХК-тай 2014 оны дөрөвдүгээр сарын 4-ний өдөр байгуулсан Концессын гэрээг цуцалчихсан.
Үүнээс болж "Кью Эс Си" ХХК болон " Дарханы төмөрлөгийн үйлдвэр" ХК-ийн хэрэгжүүлж буй Уул уурхайн, металлургийн цогцолбор барих төсөл зогсонги байдалд орсон бөгөөд цаашдаа ч үйл ажиллагаа нь хэвийн явагдах эсэх нь эргэлзээтэй.
Тодруулбал "Кью Эс Си" ХХК болон " Дарханы төмөрлөгийн үйлдвэр" ХК Засгийн газрыг шүүхэд өгч буй тухайгаа мэдэгдсэн. Харин дараагийн удаа Арбитрын шүүхэд хандахаар зэхэж байгаа тухай зарим эх сурвалж хэлж байна. Өмнө нь Монгол Улсын Засгийн газрыг гадаадын хөрөнгө оруулалттай компаниуд Арбитрын шүүхэд өгч байсан тохиолдол олон бий. Харин энэ удаа үндэсний хэмжээний аж ахуйн нэгж Засгийн газрыг ийн Арбитрын шүүхэд өгч байгаа нь анхны тохиолдол гэж хэлж болно.
Энэ эрчээрээ явбал Засгийн газар Арбитрын шүүхэд ялагдал хүлээхийн зэрэгцээ Монгол Улс хувийн хэвшилтэй хийсэн гэрээгээ зөрчиж, татварын орлого бүрдүүлдэг гол хүчээ төрийн нэрээр дарамталдаг гэх мессеж тун удахгүй бусад улс, орнуудад тархаж, гаднын хөрөнгө оруулагчид ирэхээс айж, тойрохоос аргагүйд хүргэх нь.
Уг нь Засгийн газар 2020-2024 оны үйл ажиллагааны хөтөлбөртөө хүнд үйлдвэрлэлийг хөгжүүлж, нэмүү өртөг шингэсэн бүтээгдэхүүн үйлдвэрлэх чиглэлийг тэргүүнд тусгасан бөгөөд энэ хүрээнд "Уул уурхай, металлургийн цогцолбор төсөл"-ийг дэмжинэ хэмээн УУХҮ-ийн сайд Г.Ёндон хэлж байсан
Үйл ажиллагаа нь хэвийн явагдаж байгаа талаар ам уралдан магтаж байсан Засгийн газар гэнэт концессын гэрээг цуцалж, тухайн төслийг гацаасан учраас аль ч шүүхэд ялагдал хүлээх нь гарцаагүй. Тиймдээ ч Арбитрын шүүхэд ялагдал хүлээх нь гарцаагүй учраас "сахал" гэх Д.Эрдэнэбилэгт сар бүр доллараар тооцоо хийж торгоож байгаа гэх мэдээлэл ч "гэрлийн хурд"-аар тархаж байна.
Б.Төгөлдөр
Erennews.mn