Үндэсний статистикийн хорооноос Монгол Улсын нийгэм, эдийн засгийн тоон мэдээллийг танилцууллаа. Үндэсний статистикийн хорооны хэлтсийн дарга Э.Мягмарханд “Хэрэглээний бараа үйлчилгээний үнэ 2022 оны тавдугаар сарын байдлаар өмнөх оны мөн үеэс 15.1 хувийн өсөлттэй гарсан байна. Инфляцын түвшин өмнөх оны эцсээс 7.9 хувиар өмнөх сараас 1.4 хувиар нэмэгджээ.
Улаанбаатар хотын инфляц тавдугаар сард 16.2 хувьтай байна. Харин орон нутагт хэрэглээний бараа үйлчилгээний үнэ Хөвсгөл аймагт хамгийн бага буюу 11 хувьтай байгаа бол Сэлэнгэ аймагт хамгийн их буюу 17.8 хувьтай байгаа юм.
Инфляцын 5.3 нэгж хувь буюу 35.1 хувийг хүнсний бараа, ундаа усны бүлгийн үнэ эзэлж байна. Хэрэглээний ерөнхий бүлгээр авч үзбэл тээврийн үнэ 25.6 хувь, хүнсний бараа 18 хувь, мах махан бүтээгдэхүүн 6.7 хувь, согтууруулах бус ундааны бүлгийн үнэ 25.7 хувиар өсжээ. Зочид буудал, нийтийн хоол, үйлчилгээний бүлгийн үнэ дүнгээрээ 16.8 хувиар, эм тариа эмнэлэгийн үйлчилгээний бүлгийн үнэ дүнгээрээ 16.1 хувиар тус тус өссөн байна.
Инфляцад импортын барааны үнэ 56.3 хувь нөлөөлж байна. Өмнөх оны мөн үетэй харьцуулахад инфляцад хүнсний бус бүтээгдэхүүний үнэ 6.4 нэгж хувь, импортын хүсний бүтээгдэхүүний үнэ 2.1 нэгж хувиар нөлөө үзүүлсэн юм.
Хэрэглээний үнэд голлон нөлөөлсөн 10 бүтээгдэхүүнийг танилцуулъя. Энэ нь нийт инфляцын 29.4 хувийг бүрдүүлж байгаа юм.
- Бензин А-80, 1 литр 69.5 хувь
- Дизелийн түлш, 1 литр 50.7 хувь
- Бензин А-92, 1 литр 64.8
- Түлшний мод, шуудайгаар 18.9 хувь
- Цагаан будаа, кг 28.6 хувь
- Гуанзны хоолны үнэ 21.6 хувь
- Гурилан боов, кг 17.8 хувь
- Лууван, кг 2.4 хувь
- Ургамлын тос 66.1 хувь
- Зүсээгүй талх, ширхэг 33.4 хувиар тус тус өмнөх мөн үеэс өссөн байна.
Монгол Улс 2022 оны эхний таван сард 142 улстай гадаад худалдаа хийсэн. Гадаад худалдааны тэнцэл 946 сая ам.долларын ашигтай гарсан. Гадаад худалдааны нийт бараа эргэлт 7.2 тэрбум ам доллар байгаа бөгөөд экспорт 4.1 тэрбум ам доллар, импорт 3.1 тэрбум ам доллар байна" гэлээ.
Нийгмийн салбарын статистик үзүүлэлтүүдийг Нийгмийн статистикийн хэлтсийн дарга С.Тодгэрэл "Нийгмийн даатгалын сангийн орлого энэ оны эхний таван сарын байдлаар 1.3 их наяд төгрөг болж, өмнөх оны мөн үеэс 297 тэрбум төгрөгөөр өссөн байна. Харин нийгмийн даатгалын сангаас тэтгэвэр тэтгэмж авагчид 470 мянга болж, өмнөх оны мөн үеэс 15.2 хувиар өсжээ.
2022 оны нэгдүгээр улиралд 47 мянган аж ахуйн нэгж нийгмийн даатгалын шимтгэл төлсөн бөгөөд ажилчдын медиан цалин 1 сая 450 мянган төгрөг байна" гэв.