Улсын гуравдугаар төв эмнэлэг Ховд аймаг дахь Бүсийн оношилгоо эмчилгээний төвийн эмч, мэргэжилтнүүдийг мэргэжил арга зүйгээр хангах, тусламж үйлчилгээний уялдаа холбоо, чанар хүртээмжийг сайжруулахад анхаарч хамтран ажиллаж байна.
Энэ удаад тус эмнэлгийн Сувилахуйн албанаас орон нутагт зонхилон тохиолддог зарим өвчлөлийн үед үзүүлэх сувилахуйн тусламж үйлчилгээг сайжруулж, туршлага солилцох сургалтыг анх удаа зохион байгуулаа. Сургалтад Бүсийн оношилгоо эмчилгээний төвийн болон сум, өрхийн эрүүл мэндийн төвийн нийт 160 сувилагч, тусгай мэргэжилтэн оролцжээ.
Сүүлийн жилүүдэд тархины харвалт, зүрхний шигдээсээр өвчлөх, улмаар нас барах явдал харьцангуй нэмэгдэж байна. Насны хувьд ч залуужиж байгааг эмч мэргэжилтнүүд хэлдэг. Нэг жишээ дурдахад, өнгөрсөн 2021 онд Ховд аймаг дахь Бүсийн оношилгоо эмчилгээний төвийн Мэдрэлийн тасагт 650 иргэн хэвтэн эмчлүүлсний 87 нь тархины харвалтын улмаас эмчлүүлж, хоёр нь нас барсан гэсэн мэдээлэл бий.
Өвчтөнд тусламж, үйлчилгээг цаг алдалгүй, шуурхай үзүүлж чадвал амь нас, эрүүл мэндийг нь аврах бүрэн боломжтой. Тиймээс урьдчилан сэргийлэх, өвчтөнд үзүүлэх сувилахуйн тусламж үйлчилгээг илүү чанаржуулах, сувилагч, тусгай мэргэжилтнүүдийг чадваржуулах зорилгоор Улсын гуравдугаар төв эмнэлгийн “Сувилахуйн алба”-ны баг Ховд аймагт ажлын байрны сургалт зохион байгуулж байгаа юм байна.
Сургалтыг онолын болон дадлага ажил гэсэн хоёр чиглэлээр зохион байгуулж байна. Оролцогчдыг таван өртөөнд хувааж эмнэлзүйн дадлага хийж туршлага солилцжээ. Лавлагаа шатлалын төв эмнэлэгтэй хамтран анх удаа зохион байгуулж буй энэ сургалтын үр дүнд тархины харвалт, зүрхний шигдээс, яаралтай тусламж, эрчимт эмчилгээний үед үзүүлэх сувилахуйн тусламж үйлчилгээ илүү чанаржиж, сувилагч, тусгай мэргэжилтнүүд чадваржина гэж үзэж байна.
“Тархины харвалт, зүрхний шигдээс, яаралтай тусламж, эрчимт эмчилгээний үеийн сувилахуйн тусламж үйлчилгээний цогц шийдэл” сэдэвт сургалтыг энэ сарын 13-15-ны өдрүүдэд зохион байгуулж байна.
"Монголын мэдээ" сувгийн Ховд аймаг дахь сурвалжлагч Х.Алтантуяа