Цахиагийн Элбэгдорж ерөнхийлөгчөөр ажиллах байх хугацаандаа НҮБ-д бүртгэлтэй Монгол улсын хилийн алс дөрвөн цэгийг тамгалж соёмбот хүрэл хөшөө босгож байжээ. Тэгвэл өнөөдөр Ц.Элбэгдорж өөрийн сошиал хаягт хилийн хамгийн баруун цэгт байрлах Алтай таван богдод байрлуулсан соёмбот хүрэл хөшөөний соёмбыг хазайлгах гэж оролдсон гэх мэдээллийг оруулжээ. Тэрбээр:
"Алтай таван богд - хилийн хамгийн баруун цэг. НҮБ-д бүртгэлтэй Монгол улсын хилийн алс дөрвөн цэгийг тамгалж босгосон. Түүний нэг, тус соёмбот хүрэл хөшөөний соёмбыг хазайлгах гэж оролдсоныг эгцэлж засав. Хүнд нөхцөлд сэтгэл зүтгэл, хүч хөлс гаргаж ажилласан бүх хүнд гүн талархал илэрхийлье. Монгол түмний сүлд хийморь алтан соёмбо үргэлж дээшээ, эгц байг ээ. Монголын дархан хил мөнх оршиг ээ" гэжээ.