Дархан-Уул аймгийн Хонгор сум нутаг Хустайн даваа нь цас орсоны улмаас автомашин явах боломжгүй болсон аж. Үүссэн нөхцөл байдалд хариу арга хэмжээ зохион байгуулахаар Онцгой байдлын газар, Цагдаагийн газар, Шанхай констракшин ХХК-ийн Зам ангийн дөрөвдүгээр хэсгийн ажилтнууд үдээс хойш ажиллаж суудлын автомашин нэвтрэх боломжтой болгосон байна.
Том оврын автомашин замын халтиргаа гулгаанаас үүдэн хөдөлгөөн үйлдэх боломжгүй байгаа тул төв замыг нээхээр Зам тээврийн яам, замын хяналтын ICT ХХК-аас 7 ажилтан нэмэлтээр ажиллаж байна. Мөн Сэлэнгэ аймгийн Баянгол сумын Гал түймэр унтраах, аврах 40 дүгээр ангиас хошууч Д.Батболдоор ахлуулсан хоёр автомашинтай 10 алба хаагч нэмэлтээр ажиллаж замын нэвтрэх боломжийг нээхээр ажиллаж байна.
Хустайн даваанд нийт 46 тийр буюу олон улсын ачаа тээврийн том оврын автомашин гацсанаас 18:00 цагийн орчимд 12 тийр машиныг төв замд оруулж хөдөлгөөнд нэвтрүүлсэн байна. Замын хөдөлгөөнийг бүрэн нээж зорчих хэсгийн цас, мөсийг арилгахаар мэргэжлийн байгууллагууд үргэлжлүүлэн ажиллаж байна