Монголын улаан загалмай нийгэмлэгээс сөрөг даралтат түргэн тусламжийн автомашиныг Эрүүл мэндийн яаманд хүлээлгэн өглөө.
“Ковид-19” халдварын үед өвчтөн тээвэрлэх зориулалттай иж бүрэн тоноглосон автомашиныг БНХАУ-ын ӨМӨЗО-ы Улаан загалмайн байгууллагаас хандивлаж, Монголын улаан загалмай нийгэмлэгээр дамжуулан гардуулж өгч байгаа юм.
Сөрөг даралт нь машин доторх агаарыг нарийн шүүлтүүрээр шүүх ба халдвартай хүнээс гарах нарийн ширхэгт бичил организмыг халдваргүйжүүлсний дараа машинаас үлээн гаргадаг дэвшилтэт технологид суурилсан байна. Ингэснээр хүнд халдвар дамжихаас сэргийлэх давуу талтай юм. Сөрөг даралтат түргэн тусламжийн машин агаарын даралтыг гадаах агаарын даралтаас бага байлгаж, зөвхөн гаднаас агаар нэвтрэн ордог. Уг машин дотор эмнэлгийн яаралтай анхны тусламжийн багаж тоног төхөөрөмжийг суурилуулж өгчээ. Үүнд AII6000S брэндийн амьсгалын аппарат, Aricon брэндийн зүрхний цахилгаан бичлэгийн 12 сувагтай аппарат, дефибриллятор, хяналтын дэлгэц зэрэг зүйлс багтжээ.
Энэхүү үйл ажиллагаанд ЭМЯ-ны Төрийн нарийн бичгийн дарга Ц.Эрдэмбилэг, Эрүүл мэндийн сайдын зөвлөх О.Батбаяр, Монголын улаан загалмай нийгэмлэгийн Ерөнхий нарийн бичгийн дарга Н.Болормаа, Эрүүл мэнд, нийгмийн хамгааллын газрын дарга О.Номин нар оролцлоо.
