ОХУ-ын ерөнхийлөгч В.ПУТИН-ий жил бүр иргэдтэйгээ утсаар холбогдож, асуултад нь хариулдаг “Прямая линия с Владимиром Путиным” телевизийн шууд нэвтрүүлэг 18 жилийн дараа анх удаа цуцлагджээ.
Энэхүү шууд нэвтрүүлэг 2001 оноос хойш уламжлал болсон бөгөөд 2004 онд л бололгүй өнгөрч байсан аж. Кремлийн хэвлэлийн төлөөлөгч Дмитрий Песков энэ жилийн шууд ярилцлага тодорхойгүй хугацаагаар хойшилсныг мэдээлсэн ч шалтгааныг тайлбарлаагүй байна.
Сүүлийн үед В.Путин жил бүр оролцдог байсан хэд хэдэн үйл явдлаа алгасаад байгаа нь олон улсын анхааралд орсон. Тухайлбал жил бүр ОХУ-ын Холбооны Зөвлөлд хандаж үг хэлдэг арга хэмжээ нь дөрөвдүгээр сард болох байсан ч тодорхойгүй хугацаагаар хойшлогдсон юм. Мөн өнгөрсөн сард Сочи хотод жил бүр болдог мөсний хоккейн тэмцээнд оролцох ёстой байсан ч оролцоогүй.
Уламжлал болсон үйл явдлууддаа оролцолгүй өнгөрсөн нь түүний биеийн эрүүл мэндтэй холбоотой байж болзошгүй. “Прямая линия с Владимир Путиным” шууд нэвтрүүлэг өнгөрсөн онд дөрвөн цаг гаруй хугацаанд үргэлжилж байжээ.