АНУ-д хийгдсэн эмнэл зүйн туршилтаар "Достарлимаб" хэмээх эмийн бэлдмэл нь туршилтад хамрагдсан өвчтөн бүрийн хорт хавдрыг амжилттай устгасан тухай мэдээлэл гарчээ. Нью-Йорк дахь "Мемориал Слоан Кеттеринг" хавдрын төвд туршигдаж гарсан “Достарлимаб” нь хэмээх энэхүү эм нь Жемперли гэдэг брэнд нэрээр худалдаалагдах бөгөөд эндометрийн хорт хавдрын үед хэрэглэдэг, дархлаа эмчилгээний бэлдмэл юм. Жил бүр 43 мянга орчим англичууд, 150 мянга америкчууд бүдүүн гэдэсний хорт хавдартай гэж оношлогддог байна.
/Энэхүү мэдээлийг https://www.nejm.org/doi/10.10...сайтад нийтэлсэн байна/
Харин энэ удаагийн судалгаагаар тус эмийг шулуун гэдэсний хорт хавдрын эсрэг хэрхэн ажиллахыг хүний биед туршжээ. Туршилтад шулуун гэдэсний хорт хавдартай, химийн болон цацрагийн эмчилгээ хийлгээгүй 12 өвчтөн хамрагдсан ба хавдрын шат нь 2 болон 3-р үе дээрээ байжээ. Өвчтнүүд зургаан сарын турш гурван долоо хоног тутамд достарлимабыг тариулсан ба зургаан сарын дараа туршилтад хамрагдсан 12 өвчтөнд бүгдэд нь хорт хавдрын шинж тэмдэг байхгүй болсон гэнэ. Хавдрыг илрүүлэх хамгийн сайн шинжилгээний аргууд болох MRI, PET, дурангийн шинжилгээ, биопси хийсэн боловч алинд ч хавдар илрээгүй ажээ.
Энэхүү туршилтын эхний үр дүнгүүдээс үзэхэд өнөөг хүртэл мэдээлэгдсэн хорт хавдрын эсрэг төрөл бүрийн эмийн бэлдмэлүүдээс хамгийн үр дүнтэй нь ч байж магадгүй байна. Учир нь өмнө нь ямар ч хорт хавдрын эсрэг эмчилгээ ийм өндөр үр дүнд хүрч байгаагүй юм. Туршилтын хугацаанд өвчтөнүүдийн дөрөвний гуравт нь тууралт гарах, загатнах, ядрах, дотор муухайрах зэрэг бага болон дунд зэргийн гаж нөлөө илэрсэн байна. Эдгээр 12 өвчтөний эмчилгээ бүрэн дууссан бөгөөд хавдар дахин гарч ирэх эсэхийг тогтоохын тулд судалгааны багийн хяналтад байлгаж байгаа юм. Одоогоор хэнд нь ч хавдар илрээгүй бөгөөд цаашид ч хавдар илрэхгүй байх гэдэгт судалгааны баг илтгэлтэй байгаа ажээ.