УИХ-ын чуулганы нэгдсэн хуралдаанаар Төрийн болон орон нутгийн өмчит компанийн тухай хуулийн төсөл болон хамт өргөн мэдүүлсэн хуулийн төслүүдийн хэлэлцэх эсэхийг хэлэлцэж байна.
Хууль зүй, дотоод хэргийн сайд Х.Нямбаатар: "Нэгдүгээрт, төр ямар бизнес хийх, хийхгүйг УИХ дөрвөн жилээр батална. Тэргүүлэх чиглэл гэж тодорхойлсон асуудлаар төрийн болон орон нутгийн өмчит компани байгуулах босго тавина.
Хоёрдугаарт, төрийн болон орон нутгийн өмчит компани байгуулахын тулд Хөгжлийн ерөнхий төлөвлөгөөнд багтсан, тооцоо судалгаатайгаар төр бизнес хийнэ. Хөгжлийн ерөнхий төлөвлөгөөнд багтаагүй бол хувийн сектор хийх боломжтой.
ТУЗ-ийг томилохдоо нээлттэй сонгон шалгаруулалт хийнэ. Төрийн төлөөллийг ч, хараат бус гишүүдээ ч мөн адил нээлттэй сонгон шалгаруулалтаар сонгоно.
Орон нутагт өмчийн асуудал эрхэлсэн нэгжтэй байя гэдэг шийдлийг өмнөх хуульд оруулсан байгаа. Аймаг, орон нутгууд өмчийн төлөөлөл хэрэгжүүлэх байгууллагуудынхаа бүтцийг эцэслэж шийдээгүй. Орон нутгийн өмчит компанийн тухайд тэр байгууллага нь ТУЗ, гүйцэтгэх удирдлагатай холбоотой сонгон шалгаруулалт хийх захиргааны ажлаа хариуцна. Засаг дарга томилгоог эцэслэн хийнэ.
Мөн төсөв батлах, ашиг, алдагдлыг тайлан батлах, ногдол ашиг хуваарилахын тухайд төрийн өмчит компанийнхыг УИХ, орон нутгийн өмчит компанийнхыг тухайн шатны иргэдийн төлөөлөгчдийн хурал шийднэ.
Түүнчлэн маш их хэмжээний урамшуулал авдгийг хязгаарлана. Алдагдалтай ажиллуулсан тохиолдолд тухайн өмчлөгч нь ТУЗ, гүйцэтгэх удирдлагаас алдагдлаа нэхэмжлэх эрхтэй болж байгаа. Төрийн өмчит компанийг 2 жил дараалан алдагдалтай ажиллуулсан ТУЗ, захирлыг чөлөөлж, дахин төрийн өмчит ААН-үүдэд удирдлагаар томилохгүй" хэмээлээ