Турк улсын Хамтын ажиллагаа зохицуулах агентлаг ТИКА рамадан сарыг тохиолдуулан нийслэлийн Сонгинохайрхан, Налайх дүүргийн зарим өрхөд хүнсний тусламж үзүүлэв. Энэхүү ажлыг нийслэл, аймаг, дүүргийн Хөдөлмөр, халамжийн үйлчилгээний газар болон хүмүүнлэгийн чиглэлийн ТББ-уудтай хамтран зохион байгуулж байна. Нийслэлээс гадна Увс, Хөвсгөл, Баян-Өлгий аймгийн нийт 2000 өрхөд хүнсний зайлшгүй хэрэгцээт 7 нэрийн бараа, бүтээгдэхүүнээр туслах юм. Тусламжийн хүнсний багцад "Од", "Алтан тариа", "Стимо" зэрэг манай улсын дотоодын ААН-үүдийн гурил, гоймон, нарийн боов зэрэг бараа, бүтээгдэхүүн багтжээ.
Энэ удаагийн тусламжийн барааг гардуулахад БНТУ-аас Монгол Улсад суугаа Элчин сайд Зафер Атеш, ТИКА байгууллагын суурин төлөөлөгч Эмрах Устаөмэр, манай улсаас ХНХ-ын дэд сайд С.Зулпхар, нийслэлийн Сонгинохайрхан дүүргийн Засаг дарга Н.Алтаншагай нар оролцож байна. Тусламжийн хүнсний бүтээгдэхүүнийг "Бат Гэрэлт ирээдүй", "Миний ертөнц", “Эл Бирлиги”, "Хүний хөгжлийг дэмжих гүүр" зэрэг ТББ зорилтот бүлгийн өрхүүдэд хуваарилан хүргэж байна.
Тодруулга: ТИКА нь рамадан сараар хүмүүнлэгийн тусламжийг жил бүр үзүүлдэг бөгөөд хүмүүс бие биедээ түшиг тулгуур болж өөрт байгаа зүйлээ бусадтай хуваалцах уламжлалт тусламжийг дэлхийн өнцөг булан бүрд буй зорилтот бүлгийн хүмүүст хүргэдэг. Өнгөрсөн хугацаанд ТИКА нь 87 улс орны мянга мянган хүнд Турк улсын тусламжийг хүргэжээ.
