Хөвсгөл:Мөрөн сумын "Аз тулгатан хаасууд" компани орон нутагтаа хоёр дахь түүхий эд худалдан авч боловсруулан, Улаанбаатар хотын үйлдвэрүүдэд 16 тонныг тушаасан байна.
Тухайлбал хогийн цэгт хаяж байгалийг хордуулдаг байсан ундааны сав, шар айргийн лааз, архины шил, чанамалын шил, хуванцар сав, гялгар уут, тосны бохир сав зэргийг худалдан авч, ангилан ялгаж боловсруулан үйлдвэрүүдэд нийлүүлж байгаа юм.
Мөрөн сумын иргэн Б.Ганчимэг нөхөртэйгөө хоёулаа өнгөрсөн жилээс эхлэн хоёрдогч түүхий эдийг худалдан авч ажлын гараагаа эхэлсэн бол 8 сарын дараа "Аз тулгатан хаасууд" компанийг байгуулж, 4 хүнийг тогтмол ажлын байраар ханган ажиллаж байна.
Тус компани Улаанбаатар хотын АПУ компанид 70000 шил, Газар шимд 5000 шилийг нийлүүлээд байна. Цаашид орон нутагтаа хуванцар савыг буталдаг болчихвол илүү өргөжих, ажлын байрыг нэмэгдүүлэх боломжтой гэдгийг тус компанийн менежер Б.Ганчимэг хэлж байлаа.
