Өнөөдрөөс жил гаруйн өмнө Соёлын сайд Ч.Номин Унгар улсаас Монгол Улсад суугаа онц бөгөөд бүрэн эрхт элчин сайд Борбала Обрушанскиг хүлээн авч уулзаж байв.
Энэ үед нь монголчууд сайдын амнаас Бат хааны тухай киноны талаар дорвитой хариу гарна гэж хүлээсэн ч тэр одоо ч амаа жимийсэн мэт байгаа.
Бат Хааны түүхийг өгүүлэх Унгар-Монгол-Их Британийн хамтарсан "Баруунд хүрэх гарц" уран сайхны кино, "Хүннү гүрний түүх" баримтат киног Монгол Улсад хийхээр төлөвлөсөн байдаг ч өнөөдрийг хүртэл таг. Түүхэн их хүний тухай өгүүлэх киног Монголчууд төдийгүй дэлхий тэр чигтээ чих тавин хүлээж байгаа.
Монголын Соёлын сайдыг ийнхүү амаа жимийн явах зуурт нөгөө гэрээнд нь хор гүйж кино төсөл гэрээнээсээ гажиж гол дүрийн нэгд бага насны хүүхдийг хүчирхийлэхийг завдсан хэд хэдэн хэргээр шалгагдаж байгаа Кевин Спэйсиг гэх нөхрийг тоглуулахаар зүтгэх болсон байдаг. Энэ тухай уг нь Соёлын сайд хэдэнтээ сонссон ч бас л таг.
Тийм дээ ч Монголын Соёлын сайдын мэдлэггүй, нялх балчрыг нь гайхаж, арай өөр арга хайж байгаа гэх сураг ч байдаг.
Уг нь Монголын түүхийг, монгол ахуй амьдралыг харуулсан киног монголчууд өөрсдөө л сайн мэднэ, сайн хийнэ. Тийм дээ ч киноны зохиолыг хэдэнтээ засаж байж сая нэг юм кино зохиол болгосон тухай яриа ч урлагийнхны дунд байдаг юм билээ.
Товчхондоо бол Номин сайдад болон түүний туслахууд болох ар өврийн хаалгаар шууд томилогдсон төрд ажиллаж үзээгүй, хал үзээгүй халуун чулуу долоогоогүй нөхөд Унгар, Монгол, Их Британийн хийх энэ киног ярихад ёстой л потенциал нь дутах биз.
Нөгөөтэйгүүр Соёлын яам гэж байгуулагдсанаас хойш Улсын драмын эрдмийн театрыг тойрсон томилгооны асуудлаар амтай бүхэн нь түүнээс гуйж гувшиж байгаагаас болоод тэрбээр Бат хааны тухай өгүүлэх киноны асуудлыг цараатай харж чадахгүй ямар нэгэн байдлаар томилгоотой холбогдчих гээд ёстой л аалзны шүлсэнд орооцолдсон мэт байгаа ч болов уу гэж учир мэдэх хүмүүсийн ярьсан үнэн болж таарав уу. Эсвэл учраа олохгүй аргаа олохгүй болохоороо өөрөө Бат хааны гүнж ч юм уу хатан ч юм уу, татвар ч юм уу болж зүүдлээд тууж яваа болов уу...
Гэхдээ л "Монголын Соёлын сайд мэдлэг нимгэн. Энэ кино замхарч ч мэднэ гэж гурвалсан гэрээ хийсэн нөхдүүд үг унагасан гээд бодохоор ёстой нөгөө Итгэл баяны "ИЧМЭЭР ДАМШИГ" гээч л болоод байна даа.
С.Цээл
Эх сурвалж: Erennews.mn