НҮБ-ын Хүүхдийн сан Олон улсын эмэгтэйчүүдийн Худалдаа, аж үйлдвэрийн холбоо (IWFCI Mongolia) хамтран ажиллах санамж бичигт гарын үсэг зурав. Тодруулбал, талууд хүүхдийн эрх, хүүхдэд ээлтэй гэр бүлийн бодлогыг бизнесийн байгууллагуудын үйл ажиллагаанд нэвтрүүлж хамтын ажиллагааг өргөн хүрээнд үргэлжлүүлэн ажиллахаар болов. Энэ талаар НҮБ-ын Хүүхдийн сангийн Монгол дахь суурин төлөөлөгч Эваристе Коуасси-Комлан хэлэхдээ, НҮБ-ын Хүүхдийн сан дэлхийн улс орон бүрд хүүхдийн эрх ба бизнесийн зарчмыг бизнесийн холбоодоор дамжуулан түгээн сурталчилж ирснийг онцлов.
“IWFCI Mongolia” байгууллага үүний адилаар 2019 оноос хойш НҮБ-ын Хүүхдийн сангийн үйл ажиллагааг дэмжин өөрийн гишүүн компани, ААН-үүдэд хүүхдийн эрхийг таниулан сурталчилж ирснийг тодотголоо.
“IWFCI Mongolia” байгууллагын ТУЗ-ийн дарга О.Байгаль, “Хүүхдийн эрх ба бизнесийн зарчим”-ыг өөрийн гишүүн 22 байгууллагын үйл ажиллагаанд амжилттай нэвтрүүлж буйг дурдлаа. Ялангуяа ковидын цар тахлын үед “Гэр бүлд ээлтэй бодлого”-ыг хэрэгжүүлэн ажиллахыг уриалж иржээ. Хоёр байгууллагын хамтын ажиллагааны хүрээнд бизнесийн үйл ажиллагаагаар дамжуулан хүүхдийн эрхийг хамгаалах, гэр бүлд ээлтэй ажлын байрыг бий болгон, сурталчлах зэрэг олон талт ажлыг хийхээр болов.
