“E-Mongolia системээс нэг орлогын эх үүсвэртэй бол санхүүгийн дэмжлэг олгоно” гэх агуулга бүхий мэдээлэл түгээжээ.
2026 оны 10 дугаар сарын 28-нд Mongol News нэртэй хуудаснаас “Нэг орлогын эх үүсвэртэй бол боломжит дэмжлэгээ шалгаарай. Таны мэдээлэлд үндэслэн боломжит дүн 1-2 минутын дотор тооцно. Аюулгүй найдвартай. Төрийн дэмжлэг хялбар хүрэх болно” гэх текст бүхий зураг нийтэлжээ.
Эл мэдээллийг баримт шалгах анхан шатны хаяг шалгах, зургаар хайх, агуулгыг нягтлах алхмын дагуу шалгалаа. Аливаа “дэмжлэг олгоно”, “урамшуулал өгнө”, “мөнгө олгоно” гэх мэт санхүүгийн холбогдолтой мэдээлэл шууд итгэлгүй дараах аргаах шалгаж хэвшээрэй.
Хаяг шалгах
Mongol News хуудас нь 2026 оны 10 дугаар сарын 21-нд нээгдсэн ба нийт 17 дагагчтай байна. Нүүр зурагтаа Монгол Улсын далбааг оруулж, пэйжийн ангиллаа “Gamer” гэж сонгожээ. Танилцуулга, хаяг байршил, холбогдох дугаар, сайтын холбоос зэрэг ерөнхий мэдээлэл огт оруулаагүй байна. Нээгдээд удаагүй, танилцуулга оруулаагүй, зураг, бичлэг огт нийтлээгүй, зөвхөн зар сурталчилгаа хэлбэрээр хүмүүст мэдээлэл хүргэх зэрэг нь цахим залилан үйлддэг хуурамч хаягийн нийтлэг шинж тэмдэг юм.
E-Mongolia цахим системийн албан ёсны хаяг нь нийт 216 мянга гаруй дагагчтай бөгөөд сайтын холбоос, бусад хаяг, холбоо барих мэйл хаяг зэргийг оруулж, дэлгэрэнгүй танилцуулгыг мөн бичжээ.
Зургийг шалгах
Цахим залилан үйлддэг хуурамч хаягаас ихэвчлэн хиймэл оюунаар бүтээсэн зураг, бичлэг түгээдэг. Тиймээс зургийг сайтар ажиглаж, алдаа байвал шууд хандалгүй, репортлох нь зүйтэй. Тухайлбал, шалгасан мэдээлэлд хавсаргасан зургийг сайтар ажиглавал Төрийн ордны гадна зохион байгуулалт өөр, Монгол Улсын туг алдаатай байгааг харж болно. Мөн хиймэл оюунаар бүтээсэн зураг бичлэг дэх хүний дүрслэл хэт төгс, өө сэвгүй байдаг гэдгийг анхаараарай.
Агуулгыг нягтлах
Шалгасан мэдээлэлд emongnmm.online гэх холбоосыг хавсаргажээ. E-Mongolia системийн үндсэн вэбсайтын холбоос нь e-mongolia.mn юм. Таны сэжигтэй холбоос руу хөтөлж байвал яарч үйлдэл хийлгүй холбоосыг сайтар нягтлах нь зүйтэй. Мөн WhoIS, URLVoid хэрэглүүр ашиглан тухайн сайтын мэдээллийг харах боломжтой юм.
Цахим залилангийн түгээмэл шинж тэмдэгт дараах зүйлс багтана. Үүнд:
- Хүн бүрийн хэрэглэдэг банк, системийн нэр логог ашиглах
- Аюулгүй, найдвартай мэт ойлголт өгдөг
- Шуурхай үйлдэл хийхийг уриалж, хэрэглэгчийг яаруулах
- Хялбар үйлдлээр нэмэлт мөнгө олох боломжтой гэж итгүүлдэг
- Сэжигтэй холбоос руу орохыг уриалах эсвэл хувийн чат бичиж эмзэг мэдээллийг авах гэж оролддог зэрэг шинж тэмдэгтэй байдаг.
Дүгнэлт
Сүүлийн үед хуурамч хаягаас иргэдийн хэрэглэдэг апп, систем, банкны нэр логог ашиглаж “санхүүгийн дэмжлэг, мөнгөн тэтгэмж олгоно” гэж залилах үзэгдэл ихэссээр байна. Иймд цахим орчинд түгж буй санхүүгийн холбогдолтой мэдээлэлд шууд итгэж, шуурхай үйлдэл хийхээсээ өмнө баримт шалгах анхан шатны аргаар шалгаж хэвшээрэй.
Эх сурвалж: Монголын баримт шалгах төв
