Цар тахлын улмаас БНХАУ-ын Эрээн боомтод хөл хорио тогтоогоод байгаа билээ. Эрээнд Covid-19 халдварын дөрвөн шинэ тохиолдол энэ сарын 2-нд бүртгэгдсэн тул тодорхойгүй хугацаагаар халдвар хамгааллын дэглэмийг чангаруулаад байгаа юм.
Эрээн хотод хөл хорио тогтоосонтой холбогдуулан ГХЯ-ны Хилийн хэлтсийн дарга Д.Болд "Эрээн хотод зургадугаар сарын 1-2-нд шилжих шөнө Covid-19 халдварын дөрвөн тохиолдол батлагдсан. Иймд тус хотод энэ сарын 2-оос хатуу хөл хорионы дэглэм тогтоох шийдвэрийг Эрээн хотын Цар тахалтай тэмцэх шуурхай штабаас гаргасан. Өнөөдрийн байдлаар Covid-19 халдварын 34 тохиолдол батлагдсан. Эрээн хотод батлагдсан тохиолдлуудын ойрын хавьтлыг тусгаарлалтад авсан байгаа. Мөн тус хотод тусгаарлах шаардлагатай иргэдийг ойр хотууд руу тусгаарлах арга хэмжээ авч байна" гэлээ.