"Токио-2020" олимпийн наадам, "Нур-Султан-2019" ДАШТ-ий хүрэл медальт "Женко" клубийн тамирчин ОУХМ Бат-Очирын Болортуяа Алматыгийн дэвжээнээс манайхны хоёр дахь алтан медалийг авчирлаа. Тэрбээр эзэн орны Айша Улишан, Азербайжаны Лейла Гурбанова, Казахстаны хашир туршлагатай бөх Жюлдиз Эшимова гэсэн бүх өрсөлдөгчөө цэвэр ялав.Түүний хувьд 2022 он гарснаас дөрөв дэх тэмцээндээ дараалан аваргалаад байна. Б.Болортуяа нэгдүгээр сард Красноярскт Иван Ярыгины ОУТ, хоёрдугаар сард Стамбулд Яшар Догугийн ОУТ, өнгөрсөн сард Москвад "Мэргэжлийн бөхийн лиг"-т тус тус түрүүлээд байгаа юм.
Мөн 23 хүртэлх болон насанд хүрэгчдийн ДАШТ-ий хүрэл медальт, "Хилчин" спорт хорооны тамирчин ОУХМ Мөнхтөрийн Лхагвагэрэл Казахстанд 125 кг-ын жинд хүрэл медалийн эзэн боллоо. Тэрбээр үдээс өмнө нь шөвгийн наймд Азийн аваргын хошой мөнгө, хоёр хүрэлтэй, эзэн орны Алишар Ергалиг 3:2-оор ялсан ч хагас шигшээд "Токио-2020" олимпийн хүрэл медальт, Ослогийн дэлхийн аварга Ираны Амирхоссейн Заред 0:3-аар ялагдсан. Улмаар хүрэл медалийн төлөөх барилдаанд 2021 оны Азийн аварга Олег Болтинийг 2:2-оор ялснаар шагналын тавцанд зогсов. Лхагваа өнгөрсөн жил Ослод дэлхийн медальтан болохдоо түүнийг ялж байсан бөгөөд энэ удаа нутагт нь дахин "гомдоолоо". Түүний хувьд хилийн чанадад болсон сүүлийн гурван тэмцээнд дараалан медаль хүртээд байна. Тэрээр Стамбул, Москвад үзүүрлэсэн билээ.
Эх сурвалж: МЧБХ