“Нээлттэй, цэгцтэй - Ардчилсан Нам” үндэсний аян өнөөдөр /2026.02.01/ нээлтээ хийлээ. Аяныг нээж Ардчилсан Намын дарга, УИХ дахь Ардчилсан Намын бүлгийн дарга О.Цогтгэрэл хэлсэн үгэндээ “Бид цагаан морин жилд эхлүүлсэн ардчиллын үйл хэргээ гал морин жилд дахин шинээр эхлүүлж байна. Энэхүү дахин эхлэлийн стратегийн шилжилтийн үндсэн концепт бол “НЭЭЛТТЭЙ, ЦЭГЦТЭЙ” үзэл санаа юм. Ардчилсан Нам өнгөрсөн хугацаанд ямар хаалттай, эмх замбараагүй болсныг бид хангалттай харлаа. Өнөөдрөөс эхлэн 40 хоногт Ардчилсан Намын гишүүд дахин шинэчилсэн бүртгэлдээ хамрагдаж, шинэ гишүүдээ бүртгэнэ. Тавдугаар сар гэхэд нам цэгцэрч, 2027-2028 оны нэр дэвшигчдийн нэрс шударга шалгуураар тодрох болно. Би намын даргын хувьд дотооддоо шударга байдлыг хангуулахад анхаарч хэнтэй ч хуйвалдахгүй албан тушаалаар ч, алт мөнгөөр ч худалдахгүйгээр ажиллах болно” хэмээн ярилаа.
