Улстөрчид 2024 оноос эхлээд УИХ-ын сонгуулиа бүсчилсэн хэлбэрээр хийж тогтолцоогоо өөрчилсөн. Үүнийгээ дагуулаад Бүсчилсэн хөгжлийн үзэл баримтлалыг батлан гаргасан. УИХ-ын 2024 оны 64 дугаар тогтоолын 01 дүгээр хавсралтаар баталсан тэрхүү үзэл баримтлалд бүс бүсийнхний мөрөөдлийг шингээсэн гоё гоё зүйл олон бий. Өнөөдөр УИХ-д орж суучихаад байгаа “зүүн бүсийн гишүүд” ч олон олон сайхан мөрөөдлийг сонгогчиддоо ярьдаг байв. Нэг нь “Зүүн бүс түүхэн аялал жуулчлалын тэргүүлэх бүс байгаа. Мөн хүнс, хөдөө аж ахуйн чиглэлээр дэд бүтэц болон хөгжихөөр төлөвлөсөн. Ингэж хөгжихийн тулд хамгийн чухал нь тээвэр ложистикийн зөв төлөвлөлтийг хэрэгжүүлэх шаардлагатай. Тухайлбал, боомтуудын сэргэлт, бүсүүдийг автозамаар холбох, гадаад зах зээлтэй холбосон дэд бүтэц байгуулах зэрэг асуудал чухал байна. Монгол Улс бол далайд гарцгүй төв Азийн өндөрлөгт оршдог орон. Энэ утгаараа гадаад зах зээл рүү бүтээгдэхүүнээ гаргах, бүсдээ өрсөлдөхөд хамгийн их нөлөөлдөг зүйл бол тээвэр, ложистик. Энэ нь нэг ширхэг бараа бүтээгдэхүүний үнийн 20-30 хувьд нөлөөлж байна. Тиймээс тээврийн зардлыг бууруулах нь манай улсын нэн тэргүүний сорилт” гэж байсан.
Дэлгэрэнгүй унших линк: www.zuuniimedee.mn
Б.БАЯР
Эх сурвалж: “Зууны мэдээ” сонин
