Эрх баригч МАН-ын даргын асуудал улс төрийн халуун сэдэв болсон энэ цаг үед Удирдах зөвлөлийн шийдвэр хүлээлт үүсгээд байв. Тэгвэл Удирдах зөвлөл өнгөрсөн амралтын өдөр 90 хувийн ирцтэйгээр хуралдаж, Бага хурлын товоо зарлалаа. Хурлын уур амьсгал нэлээд ширүүхэн байсан талаар эх сурвалжууд хэлэв. Учир нь МАН-ын фракц хоорондын зөрчилдөөн хурцдаж, хууль хүчний байгууллагуудыг ч татан оролцуулаад эхэлсэн. Тухайлбал, МАН- ын Нарийн бичгийн дарга Ц.Чулуунзагдыг барьж хорьсон явдал намын гишүүд төдийгүй нийгэмд ийм ойлголт төрүүлээд байгаа. Энэ асуудал Удирдах зөвлөлийн гишүүдийн уур бухимдлыг өдөөсөн гэнэ. Учир нь МАН-ын Хяналтын хорооноос Удирдах зөвлөлд ирүүлсэн албан бичигт “Намын удирдах албан тушаалтнаа барж хорьсон асуудал үнэхээр даргын сунгаатай холбоотой юу. Нийгэмд гарч буй хардлага үнэн үү. Намын даргын өрсөлдөөн шударга явж байна уу” гэсэн агуулгатай албан бичиг ирүүлсэн байж. Үүнд Удирдах зөвлөлийн гишүүд байр сууриа илэрхийлжээ. Энэ үеэр зарим нь “Ц.Чулуунзагдыг барьж хорьсон асуудлын цаана улс төр яваад байна. Ингэж нэгнээ харлуулж улс төр хийх шаардлага байна уу” гэж ширүүлсэн аж. Тэгэхэд “Тэр бол энд ярих асуудал биш. Хууль хяналтын байгууллагын ажил. Улс төрийн захиалга гэж биенээ хардаж сэрдэхээ боль” хэмээн нэг хэсэг нь оволзжээ. Нөгөө талд “Бид намын нэгдмэл байдлаа хадгалах ёстой. Хоорондоо маргалдаад тэмцэлдээд яваад байх юм бол ирэх сонгуулиудад амжилт үзүүлж чадахгүй. Бүгдээрээ нэг зорилтын төлөө явж байгаа юм чинь ингэж бие биеэ гоочлоод, элдэвлээд юүхэв.Одоо маргалдаж, муудалцаад шийдэлд хүрэхгүй. Намын гишүүд дэмжигчид Удирдах зөвлөлийн шийдвэрийг хүлээж байгаа. Ингээд хоорондоо маргалдаад үр дүнд хүрч чадахгүй тарах юм бол МАН-ын фракц эвлэж бүтэхээргүй ан цав үүссэн юм байна гэнэ. Хэдүүлээ үндсэн асуудалдаа орж, Бага хурлын товоо тогтъё” гэсэн байр суурь түрж, хурлын уур амьсгалыг намжаажээ. Энэ удаагийн Удирдах зөвлөлийн хурлаар үндсэн хоёр асуудал хэлэлцсэн болохыг УИХ-ын гишүүн А.Ариунзаяа сэтгүүлчдийн өмнө хэлж байсан. Үүний нэг нь Хяналтын хорооны албан бичиг байж. Харин удаахь нь МАН-ын даргыг сонгох Бага хуралтай холбоотой асуудал. Энэ долоо хоногийн сүүлээр буюу есдүгээр сарын 27-нд МАН Бага хурлаа зарласан. Бага хурлаараа намынхаа зохион байгуулалтын асуудлуудыг хэлэлцэх юм билээ. Өөрөөр хэлбэл, Улс төрийн намын тухай хуульд нийцүүлэн дотоод дүрэм, журмаа шинэчлэн батлах аж. Бага хурлынхаа гишүүдээ шинэчлэх асуудлыг ч хэлэлцэнэ гэсэн. Бага хурлын зарим гишүүнийг хасаж, оронд нь УИХ-д шинээр сонгогдсон болон дунд шатны намын хороог удирдаж буй хүмүүсийг оруулах бололтой. Мөн Бага хурлаар намын даргын асуудлыг хэлэлцэж, Их хурлын товоо гаргах аж. Хэдийгээр Удирдах зөвлөл нэгдмэл зарчмаа баримталсан ч хөшигний ард ширүүн тэмцэл үргэлжилсээр байгаа. МАН-ын үндсэн дүрмийн 20.3.7-д “Намын их хурлын чөлөөт цагт намын даргын орон тоо гарвал бага хуралд оролцсон гишүүдийн гуравны хоёрын саналаар шинэ даргыг сонгоно” гэсэн заалт бий. МАН- ын даргад УИХ-ын дарга Д.Амарбаясгалан, Ерөнхий сайд Г.Занданшатар нарын хооронд гал авалцсан их тулаан ирэх өдрүүдэд өрнөх нь тодорхой. Эх сурвалжуудын ярьснаар Бага хурлаа Б.Амарбаясгалан базсан сурагтай. Намаа сонгуульд ялуулсан дарга нь огцорч, харин дэвшсэн тойрогтоо өвдөг шороодсон хүн нь Ерөнхий сайд болоод зогсохгүй намын даргад зүтгэж буйд МАН-ынхан тийм ч таатай хандахгүй байгаа бололтой. Тэгэхээр Бага хурлын гишүүдийн санал Б.Амарбаясгалан дээр жин дарах нь ойлгомжтой учраас намын асуудлыг Их хуралд оруулах тухай яриа Төрийн ордноос сонсогдож эхэллээ. Ингэвэл Г.Занданшатар намын даргын суудлаа авах магадлал өндөр гэдгийг улс төр судлаачид хэлж байгаа юм. Учир нь МАН-ын Их хуралд, анхан, дунд шатны намын үүрийн дарга нар бий. Тэд бол одоо энэ УИХ-д суугаа гишүүдийн нүд, чих болсон хүмүүс. Гишүүдийн өгсөн үүрэг даалгаврыг үгээр нь дагах хамгийн үнэнч дэмжигчид нь юм. Парламент дахь МАН-ын гишүүдийн талаас илүү хувь нь мэдээж Г.Занданшатарыг “балиашиклаж” байгаа. Иймд МАН-ын Их хурлаар намын даргын асуудлыг оруулах улс төр өрнөх талтай гэдгийг хашир улстөрчид харж сууна лээ.
М.МӨНХ
Эх сурвалж: Өдрийн сонин
