Ерөнхий сайд Г.Занданшатар өчигдөр орой Иргэний зориг, ногоон намын дарга, УИХ-ын гишүүн Б.Батбаатарт “Зөвшилцөх санал хүргүүлэх тухай” албан бичгийг хүргүүлсэн юм. Тус албан бичигт “Олон улсын харилцаа, геополитикийн эгзэгтэй нөхцөл байдал үргэлжилж худалдааны тарифын зөрчилдөөн, уул уурхайн бүтээгдэхүүний зах зээлийн уналтаас үүдэлтэй эдийн засагт үзүүлэх сөрөг нөлөөллийг бууруулах, төрийн бодлогын тогтвортой байдал, залгамж чанарыг хадгалж, үндэсний эв нэгдэл хангаж ажиллах нь энэ цаг үед туйлын чухал юм” хэмээн цохон тэмдэглэсэн байна. Тиймээс эл асуудлаар бид ИЗНН-ын дарга, УИХ-ын гишүүн Б.Батбаатараас дараахь тодруулгыг авлаа.
-Ерөнхий сайд танай намтай засагт хамтрах асуудлаар зөвшилцөх бичиг өгсөн байна. Засгийн газрын бүтцэд ИЗНН орж ажиллах эсэх асуудлыг хэзээ шийдэх вэ?
-Маргааш /өнөөдөр/ 11:00 цагаас ИЗНН-ын Удирдах зөвлөлийн хурал болохоор зарлагдсан. Энэ хурлаар Засгийн газарт орж ажиллах, эсэх асуудлыг авч хэлэлцэж, эцсийн шийдвэрийг гаргана.
-Танай намын Улс төрийн зөвлөлд хэдэн хүн байдаг вэ. Одоо гишүүн байгаа хүмүүс энэ зөвлөлд багтдаг уу?
-Манай намын Улс төрийн зөвлөлд 45 хүртэлх гишүүн байдаг. Одоогоор 39 гишүүнтэй байгаа. Энэ дотор одоо УИХ-ын гишүүн байгаа хүмүүс бүгд багтдаг.
-Өмнө нь аман байдлаар танай намд нэг сайдын суудал амласан. Түүнийг нь танайх голж, өөр сайд нэхсэн гэдэг мэдээлэл явж байсан. Энэ үнэн үү?
-Өмнө нь тийм зүйл болоогүй. Ямар нэгэн байдлаар манайд санал ирүүлж байгаагүй. Харин өнөөдөр (өчигдөр) л албан бичгээр бидэнд хандаад, бид хурлаа зарлачихаад байж байна.
-Засагт орж ажиллахыг танай намын Улс төрийн зөвлөл дэмжвэл аль яамыг авах юм бэ?
-Эхлээд Улс төрийн зөвлөл маань улс төрийн шийдвэрээ гаргаг. Хамтрах ёстой юу, үгүй юу. Хамтарвал юун дээр суурилах юм. Манай намын иргэд, сонгогчдодоо амласан мөрийн хөтөлбөр, зорилго, чиглэл, эрх ашгийн эрэмбээ бодож байж л дараа нь шийднэ.
-Хамтарсан тохиолдолд танай зүгээс заавал хэрэгжүүлэх, хийх ёстой гэж үзэж байгаа зүйлс юу байна вэ?
-Санхүүгийн эрх чөлөөтэй иргэн бий болгох асуудал байна. Эрх чөлөөний тухай хууль гээд бидний зүгээс санаачилсан 20 гаруй хуулийн төсөл байгаа. Эдгээрийгээ УИХ-аар батлуулах, хэрэгжилтийг нь хангуулахад анхаарч ажиллана. Мөн байгаль орчин, хүүхэд, эмэгтэйчүүд, эрчүүдийн тухай асуудлууд гээд бий. Дээрээс нь С.Зоригийн амь насыг хөнөөсөн хэргийг илрүүлэх чиглэлд идэвхтэй ажиллана.
-Шинээр байгуулагдах Засгийн газрын бүтэц дээр ямар байр суурьтай байгаа вэ. Зарим нь засаг их цомхон бүтэцтэй байх ёстой гээд байна шүү дээ?
-Одоо байгаа бүтцээ хэрхэн өөрчлөх нь Ерөнхий сайдын эрх мэдлийн асуудал. Хэрвээ намууд хамтарсан тохиолдолд парламент дээр Засгийн газрынхаа бодлого буюу засагт хамтарсан намуудынхаа зорилго, бодлогыг хэрхэн дэмжих вэ гэдэг асуудалд бүтэц нь өөрөө уялдаж байх ёстой л гэж үзэж байгаа.
-Яг яамдын тоон дээр юу хэлэх вэ?
-Яамдын тоо цөөрөх байлгүй дээ. Яг одоогоор тэд гээд тоо хэлж мэдэхгүй байна. Өмнөх Засгийн газрын бүтэц бол “118-ын бүлэг”-т зориулсан данхар байсан. Тийм болохоор энэ удаад арай цомхон болох байх. Гэхдээ Ерөнхий сайдын оруулж ирэх саналаас л бүх зүйл хамаарна шүү дээ.
-Ардчилсан намаас бусад нь засагт хамтарлаа гэхэд энэ Засгийн газар хэр тогтвортой байх боломжтой юм бэ?
-Уг нь тогтвортой ажиллах боломж байгаа. Улс төрийн зорилго, шийдвэр, Засгийн газарт яах гэж хамтарч байгаа юм гэдгээс л асуудлууд үүснэ. Дээрээс нь хамгийн гол нь хийх ажлаас л хамаарна.
-Ерөнхий сайд Г.Занданшатар төсвийн тодотгол өргөн барина гэж мэдэгдсэн. Үүнийг та хэр зөв зүйтэй гэж үзэж байгаа вэ. Шинэ байгуулагдах Засгийн газрын нэн тэргүүнд хийх ажлууд юу байх ёстой гэж үзэж байна вэ?
-Ерөнхий сайдын мэдэгдсэнээр мэдээж төсвийн тодотгол хийж таарах юм шиг байна. Эдийн засаг ийм байгаа үед зөв байх. Одоо бол нэн яаралтай анхаарах ёстой зүйлүүд бий. Тухайлбал, өмнө нь хийгдсэн гэрээ хэлэлцээрүүд цаашаагаа идэвхтэй явах ёстой. Саяхан гуравдугаар цахилгаан станц дээр гарсан асуудал байна. Наадмын дараа намар гэдэг. Одооноос л өвөлжилтийн бэлтгэлдээ анхаарах хэрэгтэй.
ТЭРБИШИЙН ДАРХАНХӨВСГӨЛ
Эх сурвалж: Өдрийн сонин
