Төрийн ордны зүүн баруун хаалгаар цэцгийн баглаа тэврэгсэд орж , гарч харагдана. Хамтарсан засаг огцроод нэг хэсэг хүн ажилгүй болж байна. Тэдэнд л цэцэг тэврүүлээд үдэж байгаа хэрэг. Гэвч өнөө маргааш бас угтах хүмүүстээ цэцэг тэврүүлэх ёслол хийгдэнэ. Цэцэг тэврэн угтуулах хүмүүсийн эхнийх нь шинэ Ерөнхий сайд. Нэр дэвшүүлэгдэн УИХ-д ороод ирчихсэн байгаа нөхөр Г. Занданшатар. Одоо мөн ингэсгээд Төрийн байгуулалтын байнгын хороо, залгуулаад УИХ-аар орж батламжлагдах учиртай. Г.Занданшатарыг уг нь уржигдар баталчих боломжтой байлаа. Ардчилсан намынхан шаралхаад байгаа юм уу, сэтгэлүүд нь сэвэгнээд байгаа юм уу, ажлын цагт ярина гэж нэг үзсэнээ, эгэн ирж байнгын хорооноос завсарлага авсан ч, мөн тэдний ирцгүйдэл, залхагаас болоод Ерөнхий сайдыг томилох ажил хоёр хоногоор саатлаа. Ардчилсан намынхан тийнхүү мунгинахын зэрэгцээ, тэдний дотор шинэ Ерөнхий сайдад дэвшигчийг даруй ивээн томилохыг хүсэгсэд байгаа юм билээ. Тэд бол Баянхонгорын бидон Ганбаа, УИХ-ын дэд дарга Б.Пүрэвдорж, гишүүн О.Цогтгэрэл, О.Амгаланбаатар. Эдгээр нөхдийн байр суурь зөв л байна. Парламентын нь даргыг хоёронтоо хийсэн, нэгэнт дэвшигдээд ирсэн Г.Занданшатарыг даруй гүйцэтгэх засаглал толгойлох ажилд нь оруулчихая л гэж бодож. Тэгэж шуурхайлах нь ч зөв. Б.Пүрэвдорж бол ер нь л ямагт зөвийн талд яваад байдаг хүн. Бидон Ганбаа бол нутгархсан юм байлгүй гэхээс илүү жудаг тал нь л дөмөг нөхөр. О.Амгаланбаатар бас нэг тийм хар цөлх, О.Цогтгэрэл эрхбиш улс төрийн соёл бодоо биз. Ардчилсан намын ийм дөрвөн хүнээр томилуулахын хивс дэвсүүлэх Г.Занданшатарт ингэхэд тийн хүндэтгүүлэх шалтгаан юу байна вэ. Юутай ч парламентын ардчилал гэдэг зүйлийн автор. Зөвлөлдөх ардчилал, парламентын төгөлдөршлийг мань хүн тун муугүй энжүүлсэн. Хоёр ч парламент дамнаад УИХ-ыг даргалчихсан, ийм хүн Монголд үгүй билээ. Төрийн эрх барих дээд байгууллагын даргыг хоёронтоо хийчих аавын хүү тэр бүр тохиохгүй биз. Одоо гүйцэтгэх засаглал толгойлноо гээд зогсож байна. Гүйцэтгэх засаглалын тэргүүн ямар байхыг тэр тун мэдсэн байх талтай. У.Хүрэлсүх, Л.Оюун-Эрдэнэ хэмээх Ерөнхий сайдуудыг “хүмүүжүүлсэн” парламентын дарга. Нэг үгээр хэлбэл, Ерөнхий сайд парламентын өмнө ямар байж, яаж ажлаа хийхийг Г.Занданшатар шиг ойлгосон хүн үгүй л болов уу гэхээр. Монголын хамгийн удаан засагласан Ерөнхий сайд Л.Оюун-Эрдэнийн суурь тогтвор Г.Занданшатарын парламент дээр тулгуурлагдаж байсан нь хилс үгүй. Ингээд үзэхээр Г.Занданшатар парламентын удирдлага, түүний өмнө гүйцэтгэх засаглалын хэрхэн хосмолжлон ажиллах талаар эв дүй, агуулгын тэнцэтгэлд явж явж хамгийн бэлтгэгдсэн хүн мөн байх талтай байна. Засгийн газар бол өмнөх засгийн үйл ажиллагааны бодит залгамжлал. Г.Занданшатар Л.Оюун-Эрдэнийн засаг, түүний үйлсийг үргэлжлүүлнэ гэсэн мэдэгдлийг хийчихсэн бололтой байна билээ. Ингэж л явах ёстой байх л даа. Л.Оюун-Эрдэнийн Засгийн газрын гишүүдийг Г.Занданшатарын танхимд үл ажиллуулах тухай үнэмлэхүй ярьцгааж байгаа бөгөөд энэ нь УИХ-д хоёр сонгогдсон МАН-ын гишүүдийн хэлбэрэлтгүй итгэл үнэмшил, бодит шаардлага байгаа бололтой юм. Засгийн газрын гал тогоог барьж, Баялагын сан, Ураны гэрээ, нуур, худаг, овоолгын асуудлыг гол барьсан Н.Учралд бол мөнөөх хоёр сонгогдсон гишүүд харин өөр бодож, нэг үгээр хэлбэл түүний тухайтад Засагт байхад зүй ёсны гэх байдлаар хандаж байгаа нь асуудалд зарчимтай, эрүүл саруул, ултай үзэж байгаагийн илрэл. Г.Занданшатар Ерөнхий сайд томилогдоод, эхний ажил бол парламентэд суудалтай намуудын дарга нарт хандах нь тодорхой юм. Ардчилсан нам үүнд хамаарахгүй. Тэд нэгэнт сөрөг хүчинд шилжсэн. Б.Батбаатар, Т.Доржханд, Н.Номтойбаяр дарга нарт хандан, Засагтаа урих бөгөөд эдгээр хүмүүс Шадар сайдуудаар томилогдон Г.Занданшатарын Засгийн газрын тулх болох бодит нигууртай. Байгаль орчин, ногоон хөгжил, эрчим хүч, эдийн засгийн чиглэлүүдийг эрхлүүлэн. Мэргэжлийн ч харагдана. Харин Н.Номтойбаяр Г.Тэмүүлэнг илтэд дэмжин, Г.Занданшатарт илтэд хүнийрхсэн байдлыг шинэ Ерөнхий сайд хэрхэн авч үзэх сонирхолтой. Засгийн үндсэн суурь хана эдгээр хүрээнд бүтнэ. Харин сайдуудын асуудал ихээхэн ярвигтай төлөвтэй. Хоёр удаа сонгогдсон хүмүүс голлох нь тодорхой шиг байна. Г.Дамдинням, Ж.Чинбүрэн, Х.Ганхуяг, Э.Бат-Амгалан, Б.Батжаргал, Ч.Ундрам, Х.Булгантуяа, Э.Батшугар, Ц.Идэрбат, Н.Наранбаатар, Г.Тэмүүлэн, Ц.Сандаг-Очир зэрэг хүмүүс нэгэнт сайдын суудалд эгнэн тулцгаажээ. Чухам эдгээр хүмүүс голлон сайд болох нь ойлгомжтой дүр зураг харагдаж байгаа. Ц.Даваасүрэн анжгай бас давхиж яваа бололтой. Тэр бол сайд болох зүгт хэзээ дайрдгаа төрөлх мэдрэмж болгосон нөхөр л дөө. Дээрх хүмүүсээс харахад, Х.Ганхуяг уул уурхай, Ж.Чинбүрэн эрүүл мэнд, Г.Дамдинням боловсрол, Ч.Ундрам гэр бүл, хүүхэд залуучуудын салбарыг аваад явах дүр зурагтай. Б.Батжаргал гэхэд хөдөө аж ахуй, Г.Тэмүүлэн сан санхүү гэх жишээнд харагдаж байгаа юм. Э.Батшугар харилцаа холбооны яам гээд л. Гэхдээ энэ бүх хүмүүс эхлээд нэгдэн Г.Занданшатараа томилж тунхаглаад, түүндээ хамжин мэргэжлийн Засгийн газраа байгуулах хэрэгтэй юм. Төр, Засгийн ажил баахан царцанги удлаа. Одоо нэн түргэлж, шинэ Засгийн газар, Ерөнхий сайд Г.Занданшатар ажилдаа шуурхайлах хэрэгтэй байна.
Б.БАЯР
Эх сурвалж: Тug.mn
