УИХ-ын 2024 оны сонгуулиар парламентад 42 суудал авсан АН-ын дарга Л.Гантөмөрийг “өмнөх амжилтаа ахиулсан” хэмээн тус намын дүрмийн хороо үзэж, намын даргын албан тушаалд нь улираасан.
Ингээд Л.Гантөмөр хамтарсан Засгийн газарт Тэргүүн шадар сайдын албан тушаал хашиж, Эдийн засаг хөгжлийн яамыг тэргүүлж байсан ч, тавдугаар сарын 21 /2025.05.21/-ны өдөр хуралдсан МАН-ын Бага хурлаас “АН-ыг Засгийн газраас хасах” шийдвэр гаргаж, улмаар Ерөнхий сайд Л.Оюун-Эрдэнэ ч саяхан огцорсон. Харин МАН-ын Бага хурлын шийдвэрийн маргааш /2025.05.22/ болсон АН-ын Улс төрийн зөвлөлийн хуралд Л.Гантөмөр оролцож, “Ийм нөхцөл байдалд АН-ын даргын албан тушаалыг хаших хүсэлгүй байна” гэсэн утгатай зүйлийг ярьсан байдаг.
Гэсэн хэдий ч өнөөдрийг хүртэл Л.Гантөмөр АН-ын даргын албан тушаалаасаа чөлөөлөгдөх өргөдлөө гаргаагүй байгаа юм.
Тэгвэл Л.Гантөмөрийг АН-ын даргаас нь чөлөөлөх хөдөлгөөн тус нам дотор өрнөж байгаа бололтой. Тодруулбал, АН-ын Үндэсний бодлогын хороо /ҮБХ/-ны зарим гишүүд “ҮБХ-ны хурлаа ойрын хугацаанд зарлаж, АН-ын даргын асуудлыг хэлэлцэн, шийдвэрлэх”-ийг тус хорооны дарга О.Амгаланбаатараас шаардаж, шаардахыг бичгийг хүргүүлж байгаа аж. Иймд ойрын хугацаанд АН-ын Үндэсний бодлогын хороо /ҮБХ/ хуралдаж, “Л.Гантөмөрийг намын даргаас чөлөөлж, дараагийн даргаа тодруулах” төлөвтэй байна.
Ардчилсан намын Үндэсний бодлогын хорооны тэргүүлэгчдийн хурал өнгөрөгч тавдугаар сар /2025.05.02/-д болж, ҮБХ-ны даргаар УИХ-ын гишүүн О.Амгаланбаатарыг сонгосон байдаг. Иймд О.Амгаланбаатар нь АН-ын ҮБХ-ны хурлыг зарлах, даргалах эрхтэй болсон юм.
Сонирхуулахад, АН-ын Үндэсний бодлогын хороо нь тус намын удирдах дээд байгууллага бөгөөд намын бодлого, стратеги, дотоод зохион байгуулалттай холбоотой чухал шийдвэрүүдийг гаргадаг. Харин УИХ-ын гишүүн, ҮБХ-ны дарга О.Амгаланбаатар нь "Л.Гантөмөрийг АН-ын даргаас нь огцруулах гарын үсэг"-ийг 2024 оны 10 дугаар сараас эхлэн цуглуулж эхлээд байсан юм.
