Шатахууны үнэ нэг шөнийн дотор тодорхой хэмжээгээр нэмэгдсэн асуудлаар Аж үйлдвэр, эрдэс баялгийн сайд Ц.Туваанаас тодрууллаа.
-Өнгөрсөн долоо хоногийн баасан гаригийн шөнө зарим ШТС-ууд үнэ нэмсэн асуудалд иргэд шүүмжлэлтэй хандаж байна. Салбарын сайдын хувьд энэхүү үйлдэлд ямар байр суурь илэрхийлэх вэ?
-Зарим шатахуун түгээх станцууд өнгөрсөн баасан гаригт АИ-92 бензиний үнийг литр тутамд 200 төгрөгөөр нэмэгдүүлэх шийдвэр гаргасан байна лээ. Үнэ нэмэх гэж байгаа асуудлаараа манай Аж үйлдвэр, эрдэс баялгийн яаманд мэдэгдээгүй. Төр, хувийн хэвшил оролцсон Үнийн зөвлөл гэж байдаг. Энэ зөвлөлийн тавдугаар сарын 5-ны өдрийн хуралдаанаар үнийн асуудлыг хэлэлцсэн. Улмаар энэ сарын 25-нд дахиж хуралдаад шийдлүүдээ ярилцъя гэдэг шийдвэр гаргасан юм.
Харамсалтай нь нефть импортлогч компаниуд энэхүү хэлэлцээ, ярианаасаа буцаж үнэ нэмэх асуудлаар гэнэтийн шийдвэр гаргачихлаа. Энэхүү шийдвэртэй холбоотойгоор бид мэдэгдэл гаргасан байгаа. Импортын бензиний үнэ нэмэгдээгүй байхад ярьж тохирсноосоо буцаж болохгүй гэдэг мэдэгдлийг хүргүүлсэн. Тэр битгий хэл түлшний хувьд тонн тутамдаа 100 ам.доллараар буурсан байхад ийм шийдвэр гаргасанд гайхаж байна.
-Импортлогч компаниудын хувьд ямар шалтгаан хэлж байна вэ?
-Үнэнийг хэлэхэд тэдний нэг нь ч утсаа аваагүй. Яагаад үнэ нэмэв, яагаад ийм шийдвэр гаргав гэж асууж холбогдох гэсэн боловч нэг нь ч утсаа аваагүй. Гэхдээ ганц зүйл хэлж байгаа. Тэр нь валютын ханш өссөн учраас АИ-92 бензин дээр хүнд тусаж байгаа гэдэг шалтгааныг хэлсэн. Бид хариуд нь түлш тонн тутамдаа 100 ам.доллараар буурчихаад байхад яагаад шатахууны үнээ бууруулахгүй байна вэ гэдэг асуудлыг тавьсан. Намайг өчигдөр орон нутагт ажиллаж байхад зарим шатахуун түгээх станцууд АИ-92 бензинээс бусад бүтээгдэхүүнийхээ үнийг литр тутамд 200 төгрөгөөр буулгасан гэж мэдэгдсэн.
-Үнэ нэмчихлээ. Таны хэлж байгаагаар шатахуун импортлогч компаниуд ярьснааасаа буцаж, ямар нэгэн мэдэгдэл хийлгүйгээр шууд үнээ нэмсэн байна. Үүнд салбар яамны зүгээс хариуцлага тооцох асуудал байдаг уу?
-Үнийг хэлэхэд, төрийн зүгээс буюу салбар яамны зүгээс уг асуудалд шууд хариуцлага ярих боломж хязгаарлагдмал
байдаг. Асуудлыг бид зөвшилцөх байдлаар шийдвэрлэж ирсэн. Мөн Үнийн зөвлөлөөс зөвлөмж гардаг ийм л уялдаатайгаар ажиллаж байна. Нөгөөтэйгүүр иргэдийн санал, шүүмжлэлтэй холбоотой асуудлаар Шударга өрсөлдөөн хэрэглэгчийн төлөө газарт шаардлага хүргүүлж хандсан байгаа. Юутай ч бидний хувьд уг асуудлыг зүгээр хараад юм уу, эсвэл чимээгүй өнгөрөөхгүй.
-Чоно борооноор гэдэг шиг улс төрийн нөхцөл байдал шуугиад ирэхтэй зэрэгцээд шатахуун импотлогч компаниуд гэнэт ийм шийдвэр гаргачихлаа гэж харах өнцөг байна. Үүнд та сайдын хувьд ямар байр суурьтай байна вэ?
-Яг л ийм нөхцөл байдалтай давхцаад уг асуудал болж байгаа учраас ингэж харах, хардах зүйл бол байна. Шатахуун импортлогч компаниудад хүргүүлсэн мэдэгдэлдээ ч бид уг асуудлыг хөндөж уламжилсан байгаа. Шулуухан хэлэхэд, улс төрийн нөхцөл байдал хурцадмал энэ үед манай дотоодын нефть импортлогч компаниуд гэнэтийн шийдвэр гаргалгүй хүлээх боломжтой л байсан. Тиймээс салбар яамны хувьд Монополийн эсрэг хуулиар уг асуудалд арга хэмжээ авч ажиллана.
-Цаашид ер нь яах вэ, мэдээж энэ асуудлыг та чимээгүй өнгөрөөхгүй гэж хэллээ. Тэгэхээр торгууль, акт зэрэг хариуцлагын арга хэмжээ авах уу?
-Яг одоо яагаад үнэ нэмсэн асуудлаар ажлын хэсэг гарчихсан судалж байна. Шалтгаан нөхцөл нь торгууль тавигдах хэмжээнд байвал бид ямар ч эргэлзээгүй энэхүү асуудлыг хөндөнө. Өмнө тавьж байсан, одоо ч тавина. Ярьсан хэлсэндээ байж чадаагүй учраас бид ч бас шаардлагатай арга хэмжээнүүдийг авна. Учир нь бид ард түмнийхээ талд байх ёстой.
-Нөөцийн хувьд ер нь ямар байгаа юм бэ. Нөөц нь дуусчихаад ингээд байна уу?
-Нөөц манай улсад хангалттай байгаа. Өөрөөр хэлбэл, үнэ нэмэгдэх шалтгаан нөөцөөс хамаарахгүй. Нефтийн бүтээгдэхүүн тус бүр дээр сар болон түүнээс дээш хугацаанд хэрэглэх нөөц бий.
-Таны хувьд энэ Засгийн газрын АН-аас томилогдсон сайд. Улс төрийн нөхцөл байдалд та ямар байр суурьтай байна. Нөгөөтэйгүүр Засгийн газар огцорлоо гэхэд том төслүүд цааш үргэлжлэх боломжгүй гэж байна. Үүнд тайлбар өгөхгүй юу?
-Монгол Улс бол төрт улс. Төрийн эрх барих дээд байгууллага нь УИХ буюу парламент. Тэгэхээр парламентаар батлагдсан асуудал Засгийн газар огцрох эсхээс үл хамаараад хэрэгжих ёстой. Магадгүй янз бүрийн хүндрэлүүд гарахыг үгүйсгэхгүй. Том төслүүдийг хэрэгжүүлээд явахад дан ганц шийдвэр гэхээс илүү барьж аваад зүтгүүлээд явахад сэтгэл, хүчин чармайлт шаарддаг.
Э.МӨНХ
Эх сурвалж: Өдрийн сонин
