Засгийн газрын 2025 оны дөрөвдүгээр сарын 30-ний өдөр өргөн мэдүүлсэн “Монгол Улсын хөгжлийн 2026 оны төлөвлөгөө батлах тухай” УИХ-ын тогтоолын төслийг хоёр дахь хэлэлцүүлэгт бэлтгэсэн талаарх байнгын хорооны дүгнэлтийг УИХ-ын гишүүн М.Бадамсүрэн танилцуулав. Монгол Улсын парламент анх удаа 126 гишүүнтэй өргөн бүрэлдэхүүнтэйгээр Монгол Улсын хөгжлийн төлөвлөгөөг хэлэлцэж байгааг УИХ-ын дарга Д.Амарбаясгалан онцлов. Байнгын хорооноос 141 зарчмын зөрүүтэй санал гарчээ. Иймд гишүүдийг өнөөдрийн чуулганд тогтвор, суурьшилтай, идэвхтэй оролцохыг уриаллаа. “Монгол Улсын хөгжлийн 2026 оны төлөвлөгөө батлах тухай” УИХ-ын тогтоолын төслийн ажлын хэсэгт УИХ-ын гишүүн, Монгол Улсын Тэргүүн Шадар сайд, Эдийн засаг, хөгжлийн сайд Л.Гантөмөр, ЗГХЭГ-ын дарга Н.Учрал, Боомтийн сэргэлтийн үндэсний хорооны дарга Б.Тулга, А.Эрдэнэбүрэн, Б.Батцэцэг, О.Алтангэрэл, С.Бямбацогт, С.Одонтуяа, П.Наранбаяр, Л.Энх-Амгалан, Б.Дэлгэрсайхан, Ж.Батсуурь, Ц.Баатархүү, Б.Чойжилсүрэн нарын сайд нар болон төрийн нарын бичгийн дарга нар багтаж байна.
УИХ-ын гишүүн Н.Наранбаатар: -Бүсийн зөвлөгөөнөөс гарсан хөрөнгө оруулалт, хууль тогтоомжийн өөрчлөлт, бүсчилсэн хөгжилтэй холбоотой асуудлуудыг 2026 оны хөгжлийн төлөвлөгөөнд хэрхэн тусгаж байгаа вэ?
Эдийн засаг, хөгжлийн сайд Л.Гантөмөр: -Бүсийн зөвлөгөөн дээр яригдаж байгаа гол асуудал бол, бүсчилсэн хөгжлийнхөө бодлогыг нэгдсэн байдлаар гаргая гэдэг дээр хэлэлцүүлэг хийж байгаа юм. Харамсалтай нь бүсийн зөвлөгөөн болох явцын дунд тухайн бүс нутагт байгаа асуудлыг шийдвэрлэх гэж байгаа хурал мэтээр утга санаа нь алдагддаг зүйл ажиглагдсан. Тэгэхдээ бид Засгийн газар дээр тухайн бүс нутагт хэрэгжүүлэх төслийн жагсаалтыг гаргаад, тогтоол шийдвэрүүдээ гаргаад явна. Хөгжлийн сангийн зарцуулалтыг бүсчилсэн байдлаар хийх нь зүйтэй гэдэг дээр санал нэг байгаа. Харин хөгжлийн сангийнхаа менежментийг шууд бүс рүүгээ аваачаад өгнө гэвэл зөрчил үүснэ. Тэгэхээр тухайн бүсүүдэд мөнгө нь хуваарилагддаг, тэндээс санал нь ирдэг, нэгдсэн байдлаар Засгийн газар өөрөө шийдвэрээ гаргадаг байхаар явахгүй л бол сан байгуулаад өгчихөөр манайхан яаж туйлдгийг бид нар мэднэ шүү дээ. Бүсчилсэн хөгжил бол үзэл санаандаа, төлөвлөгөөндөө, төлөвлөлтдөө байх ёстой. Жишээ нь, говийн бүсийн хөгжлийг бид Японы Засгийн газартай хамтран хийх хэрэгтэй гэж харж байгаа. Бид дангаараа хийнэ гэвэл хүчин чадал, туршлага дутаж байгаа. Маш олон жилийн турш говийг устай болгоно, хөгжүүлнэ гэж хүн бүр ярьсан гэвч үр дүн гараагүй.
Эх сурвалж:www.polit.mn
