Увс : АНУ-ын Элчин сайдын яамны Олон нийттэй харилцах албаны дарга Жон Браун, Улс төрийн хэлтсийн ажилтан Maura, Америкийн төвүүдийн захирал Д.Болормаа, Хэвлэл мэдээлэл хариуцсан ажилтан Ц.Амартүвшин нар энэ сарын 5, 6-ны өдрүүдэд Увс аймагт ажиллалаа.
Энэ хүрээнд аймгийн Засаг даргын орлогч Ж.Александр, ЗДТГ-ын дарга Г.Болор-Эрдэнэ, ЗДТГ-ын Нийгмийн бодлогын хэлтсийн дарга Б.Ядамсүрэн нартай уулзсан ба АНУ-ын ЭСЯ-наас Төв номын сангийн дэргэд Америкийн соёл мэдээллийн төвийг байгуулсан нь тус орны хэл, соёлыг бүхий л насныхан таньж мэдэх боломжийг бүрдүүлсэн гэдгийг удирдлагууд онцоллоо. Цаашид ЕБС-ийн англи хэлний багш нарын академик түвшний хэлний чадвар, төрийн албан хаагчдын англи хэлний мэдлэгийг дээшлүүлэхэд дэмжиж ажиллах саналыг илэрхийлсэн аж.
Мөн орон нутаг дахь Америкт төгсөгчид, англи хэлний сургагч багш нар, ТББ-уудын төлөөлөл, болон хэвлэл мэдээллийн байгууллагын ажилтнуудтай уулзаж тулгамдсан асуудал, хамтын ажиллагаа, дэмжлэгийн талаар санал сонсох уулзалтыг үе шаттай зохион байгууллаа.
Энэ үеэр Увс аймгийн түүх, аж байдалтай танилцах зорилгоор Музейн үйл ажиллагаатай танилцсанаас гадна музейн харьяанд байрлах “Харлаг бэйсийн сүм” дурсгалаар орлоо. Харлаг Бэйсийн сүмийг сэргээн засварлах ажлын хүрээнд АНУ-ын ЭСЯ-наас зарладаг "Элчин сайдын нэрэмжит Соёлын өвийг хамгаалах сан" хөтөлбөрт сүүлийн 2 жил дараалан өргөдөл гаргаад байгаа юм. Цаашид Соёл урлагийн салбарт соёлын биет болон биет бус өвийн хадгалалт, хамгаалалт, тэдгээрийг нийтэд сурталчлах, түгээн дэлгэрүүлэх чиглэлээр хамтран ажиллахаар санал солилцлоо. Уулзалтын төгсгөлд малчин өрхийн ахуй амьдралтай танилцах гээд нутгийн иргэдэд түшиглэсэн уулзалтуудыг зохион байгууллаа.
Тус албан ажлын тэргүүлэх зорилго нь Элчин сайдын яамны санхүүжилтээр “Увсын өнгө” сонин, сайтаас хэрэгжүүлэх “Орон нутгийн сэтгүүлчид хуурамч мэдээллийн эсрэг” сургалт, төслийн нээлтэд оролцох замаар орон нутгийн хамтын ажиллагааг өргөжүүлэхэд харилцан санал солилцлоо. Уг төслийн хүрээнд Увс, Ховд аймгийн сэтгүүлч, хэвлэл мэдээллийн ажилтнуудад зориулсан 2 өдрийн сургалтыг Монголын эрэн сурвалжлах сэтгүүлчдийн төлөө төвийн гүйцэтгэх захирал Ц.Тамир удирдан явууллаа. Сэтгүүлчид хуурамч мэдээлэл, эрэн сурвалжлах сэтгүүлзүйн чиглэлээр мэдлэг цуглуулж, туршлага хуримтлуулсан үр өгөөжтэй сургалт байлаа хэмээн сургалтын баг хамт олонд талархал илэрхийлсэн юм.
Энэ үеэр АНУ-ын Элчин сайдын яамны Олон нийттэй харилцах албаны дарга Жон Браун
“Миний хувьд АНУ-ын Элчин сайдын яамны Олон нийттэй харилцах албаны даргаар ажиллаад удаагүй байгаа тул бүс нутгийн иргэдтэй уулзаж, нөхцөл байдалтай газар дээр нь танилцах эрмэлзэлтэй байсан. Цаашид хамтран ажиллахад бидний зүгээс ямар дэмжлэг хэрэгтэй байгааг мэдэхийг хүссэн. Өнгөрсөн хугацаанд АНУ-ын Элчин сайдын яамны дэмжлэгтэй Америкийн соёл мэдээллийн төв байгуулагдан ажиллаж байна. Тус төвийн ажилтнуудтай уулзаж саналыг нь сонслоо. Соёл мэдээллийн төвөөр дамжуулан хэл, соёлыг түгээх, мэдлэг мэдээллээр хангах сургалт, үйл ажиллагаанууд үнэ төлбөргүй явагддаг. Иргэдийн хамгийн их хүсдэг зүйл нь англи хэл сурах, мөн АНУ-д сурах сонирхолтой байдаг. Тэгвэл хүүхэд, залуучуудад энэ төрлийн мэдээлэл зөвлөгөөг өгөх, хэлний мэдлэгийг нь сайжруулахад том дэмжлэг болж байна. Цаашид илүү өргөн хүрээнд ажиллахын тулд талуудын санал хүсэлтийг сонсоход таатай байлаа.
Энэ удаагийн айлчлалын маань бас нэгэн онцлог зүйл нь Увс аймагт хэрэгжүүлэх “Орон нутгийн сэтгүүлчид хуурамч мэдээллийн эсрэг” сургалт төслийнхөө нээлтийг хийх, хэрэгцээ шаардлагыг бодитоор харах байлаа. Энэ хүрээнд сэтгүүлчид хуурамч мэдээллийг ялгаж таних, хуурамч мэдээллийн эсрэг хэрхэн ажиллах талаар мэдлэг, туршлагаа сайжруулж байна. Сэтгүүлчид энэ чиглэлээр чадваржиж, иргэдэд үнэн зөв мэдээллийг өгөх улмаар иргэд зөв сонголт шийдвэр гаргадаг болох юм” хэмээн онцоллоо.
“Орон нутгийн сэтгүүлчид хуурамч мэдээллийн эсрэг” сургалт төслийн хүрээнд Увс, Ховд аймгийн сэтгүүлчдэд зориулсан танхимын болон онлайн сургалтууд үе шаттай зохион байгуулахаар төлөвлөөд байна.