Хүний эрхийн үндэсний комисс сонгуулийн үеэрх хүний эрхийн зөрчлийн талаар мэдээлэл хийлээ.
ХЭҮК-ын ахлах референт Ч.Ариунаа "УИХ-ын 2024 оны ээлжит сонгуулийн үеэр санал авах байрны хэмжээнээс хамаарч ширээ хоорондын зай хэт ойрхон байрласны улмаас сонгогч нууцаар санал өгөх боломж бүрдээгүй. Төрийн бус байгууллагуудын 240 ажиглагч 112 хэсгийн хороонд ажиглалт хийхэд 48 хэсгийн хооронд тэргэнцэртэй сонгогч санал авах байр руу орох боломжгүй, 29 хэсэгт хөгжлийн бэрхшээлтэй иргэдэд зориулсан нэгээс доошгүй санал авах бүхээг бэлдээгүй, 16 хэсэгт харааны бэрхшээлтэй иргэд саналаа өгөхөд саналын хуудсыг унших брайл үсэгтэй хавтас байгаагүй зэрэг зөрчил илэрсэн. Зарим хэсгийн хороод зөөврийн битүүмжилсэн саналын хайрцгаар санал авахдаа санал авах бүхээг, хуруунд бэхэн тэмдэглэгээ хийхийг орхигдуулсан. Зөөврийн битүүмжилсэн саналын хайрцгаар санал авахаар хэсгийн хорооны гишүүд болон ажиглалт хийх 9 хүний бүрэлдэхүүн айлд орж байгаа нь бага насны хүүхэд, хэвтрийн хүнд өвчтэй өрхийн гишүүдэд хүндрэл учруулсан, гутлын улавч өмсөөгүй, маск зүүгээгүй нь өрхийн гишүүдийн эрүүл, аюулгүй байдалд сөргөөр нөлөөлсөн зэрэг зөрчил гарсан.
Монгол Улсад 115 000 хөгжлийн бэрхшээлтэй иргэн байгаагийн 82 000 гаруй нь сонгуулийн насныхан. Нийт сонгогчдын долоон хувийг эзэлдэг эдгээр иргэд14-16 хувь нь ганцаараа саналын авах байранд очих боломжгүй. Үүнд үндэслэн хөгжлийн бэрхшээлтэй иргэдэд сонгуулийн санал авах байрын хүртээмжид мониторинг хийсэн. Нийт санал авах байрны 75 хувь нь нэгдүгээр давхарт, 26 хувь нь хоёр, гурав болон В1 давхарт байрлаж байсан. Гэтэл эдгээр санал авах байрууд нь хөгжлийн бэрхшээлтэй иргэд бие даан нэвтрэх боломж хязгаарлагдмал, 95 хувь нь орц, гарцын хувьд хүндрэлтэй байсан. Түүнчлэн санал авах байранд сонсголын бэрхшээлтэй хүмүүсийн мэдээ, мэдээлэл хангалтгүй, хэл ярианы бэрхшээлтэй хүнтэй харилцах арга зүйг эзэмшээгүй ажилтнууд байсан" гэлээ.
