Сонгуулийн дараа Засгийн газраа байгуулах гэж зөвшилцлийн ажлын хэсэг хүртэл байгуулаад буй. МАН-ын Удирдах зөвлөлөөс байгуулсан тус ажлын хэсгийг МАН-ын дарга Л.Оюун-Эрдэнэ, УИХ-ын дарга Д.Амарбаясгалан, МАН-ын Ерөнхий нарийн бичгийн даргын үүрэг гүйцэтгэгч Я.Содбаатар нар ахалж байгаа бөгөөд Ерөнхийлөгч, Ерөнхий сайдаар ажиллаж байсан намын гишүүдээсээ зөвлөгөө авч байгаа гэх.МАН-ын хоёроос дээш удаа сонгогдсон УИХ-ын гишүүд сайд болох хүсэлтээ намын даргадаа өгчээ.
Гэхдээ Ерөнхий сайд Л.Оюун-Эрдэнэ хуучин Засгийн газраасаа зарим сайд нараа авч үлдэх бөгөөд одоогоор шинээр ямар хүмүүсийг сайдаар томилох нь тодорхой болоогүй байгаа юм. Гэхдээ жагсаалтын гишүүдээс сайд томилохгүй гэдгийг намын дарга хэлсэн.Харин өчигдөр орой АН-ын Улс төрийн зөвлөл хуралдаж эрх баригч намаас тавьсан Засгийн газарт хамтрах саналыг хүлээн авахаар шийдвэрлэсэн. Энэ бол зөвхөн хамтрах шийдвэр. Цаашдаа намууд зөвшилцөж аль, аль яамыг АН-д өгөхөө хэлэлцэх юм. Эх сурвалжийн мэдээлж буйгаар АН-д Эрүүл мэнд, Барилга хот байгуулалт, Хөдөлмөр нийгмийн хамгаалал, Дотоод хэргийн яам, Уул уурхай яам гэсэн таван яамнаас гадна Спорт хариуцсан сайд, Шадар сайд гэсэн хоёр сайдын албан тушаалыг санал болгожээ. Хэрвээ энэ саналыг АН хүлээж авбал сайд нарын томилгоондоо орно.
АН-ын тухайд мөн л жагсаалтаар гишүүн болсон хүмүүсээс сайд томилохгүй гэсэн байр суурьтай байгаа ч намын дарга Л.Гантөмөр нь өөрөө Шадар сайд болох тохироо хийсэн гэсэн мэдээлэл ч байгаа юм.Эвслийн Засгийн газарт АН-8, ХҮН нам-1, МАН 16 сайдтай байхаар эхний тохироогоо талууд хийжээ. Гэхдээ ганц сайдын суудлыг бус дэд сайд, агентлагийн дарга, төрийн өмчит компаниудын дарга гээд Засгийн газраас томилдог бүх албан тушаалыг хамтарсан намуудтайгаа хуваах юм. Манай улсын төрийн албанд 300 мянга орчим албан хаагч ажилладаг бөгөөд үүний 2000 гаруй нь удирдах албан тушаал байдаг гэсэн тоо бий. Тиймээс хамтарсан Засгийн газар байгуулагдсанаар эдгээр албан тушаалыг хуваан томилно гэсэн үг.
