Парис 2024 зуны Олимп, паралимпийн наадамд оролцох үндэсний шигшээ багийн ёслолын хувцсыг "Michel & Amazonka" брэнд танилцууллаа.
“Парис 2024” олимпийн наадамд оролцох Монголын баг тамирчдын хувцасны үйлдвэрлэгч болон загварыг сонгон шалгаруулахаар 18-60 насны 9,222 иргэн, Үндэсний шигшээ багийн 303 хүний дунд санал асуулга явуулж, 17 брэндийг нэрлэсэн байна. Үүний хүрээнд Монголын үндэсний олимпийн хорооны хамгийн өндөр санал авсан 10 байгууллагатай хамтран ажиллах үйл ажиллагаа өрнүүлж, “Michel & Amazonka” брэнд баг тамирчдын ёслолын хувцсыг, “Mizuno” брэнд спортын хувцсыг урлахаар шийдвэрлэж байсан юм. Ийнхүү баг тамирчдын хувцас эцсийн байдлаар бэлэн болжээ.