Шанхайн Хамтын Ажиллагааны Байгууллагын 24 дэх дээд хэмжээний уулзалт өнөөдрөөс эхэлж буй. Хоёр өдрийн турш үргэлжлэх тус чуулганыг Казахстан зохион байгуулж байгуулж байгаа юм.
ОХУ-ын Ерөнхийлөгч Владимир Путин тус дээд хэмжээний уулзалтад оролцохоор мягмар гарагт /2024.07.02/ Астана хотод газарджээ.
Путин тус чуулганд оролцохын хажуугаар хэд хэдэн улсын төрийн тэргүүнтэй уулзахаар төлөвлөсний нэг нь Монгол Улсын Ерөнхийлөгч У.Хүрэлсүх гэж “Риа Новости” агентлаг мэдээлсэн байна.
Тус агентлаг хоёр улсын төрийн тэргүүнүүд уулзана гэхээс өөр мэдээлэл нийтлэлдээ дурдаагүй юм.
Энэ удаагийн ШХАБ-ын дээд хэмжээний уулзалтыг “Олон талт яриа хэлэлцээг бэхжүүлэх, тогтвортой, энх тайван хөгжлийн төлөө тэмүүлэх нь” нэртэй уриа дор явуулж буй.
Уулзалтын үндсэн хөтөлбөр пүрэв гарагт /2024.07.04/ явагдана. Тус өдөр гишүүн орнуудын тэргүүнүүд хэд хэдэн асуудлаар санал бодлуудаа хуваалцаж, хамтын ажиллагааны талаар хэлэлцэнэ.
Мөн ШХАБ-ын 2023-2024 оны үйл ажиллагааны үр дүнг нэгтгэн дүгнэж, тус байгууллагыг цаашид хэрхэн бэхжүүлж, улс төр, аюулгүй байдал, эдийн засаг, хүмүүнлэгийн салбарт хамтын ажиллагааг хөгжүүлэх талаар хэлэлцэх юм.