2024 оны УИХ-ын сонгуулийн хоёрдугаар тойрог буюу Ховд, Завхан, Увс, Говь-Алтай аймгуудад Ардчилсан намаас нэр дэвшиж буй Физикийн ухааны доктор, Арбитрч Норовын Тэгшбаяртай ярилцлаа.
-Таны хувьд энэ удаагийн сонгуулийн баруун бүсэд АН-аас нэр дэвшиж байгаа. Сурталчилгааны ажил хэр явж байна вэ?
-УИХ-ын энэ удаагийн сонгуулийн сурталчилгааны хугацаа эхлээд нэлээд хэд хоног өнгөрч байна. Сурталчилгаа эхэлснээс хойш АН-аас нэр дэвшиж буй 10 хүн хамтдаа иргэд, сонгогчидтойгоо уулзалтаа хийгээд, мөрийн хөтөлбөрөө танилцуулаад явж байгаа. Ер нь очсон аймаг, сум бүрд л бороо хуртай угтаж, ард түмэн халуун дотноор хүлээн авч байгаад их баяртай байна. Баруун бүсэд ганц доктор нэр дэвшиж байгаад талархаж байна гээд хүмүүс дэмжиж буйд их урамтай явна.
-Орон нутгийн иргэд, сонгогчид АН-ыг хэр их дэмжиж байна вэ?
-Ардчилсан намаас баруун бүсэд нэр дэвшиж байгаа хүмүүст иргэд их ам сайтай байгаа. Төрийн ажлын туршлагатай, нэр цэвэр хүмүүс бий. Аймгийн Засаг даргаар ажиллаж байсан, одоо ажиллаж байгаа, УИХ-ын гишүүнээр ажиллаж байгаа, гавьяат эдийн засагч, хуульч, эрдэмтэн гээд салбар, салбарын хүмүүс нэр дэвшиж байгаа учраас багаар нь дэмжинэ гэдгээ олон хүн илэрхийлж байна. Сүүлийн найман жилийн хугацаанд МАН засагласан. Харин энэ алдагдсан найман жилийн алдааг засах хэрэгтэй гэсэн хүлээлт ард түмэнд их байгаа нь харагдсан. Учир нь төсөв хэт томорч, дарга нарын зарцуулдаг мөнгө нэмэгдсэн. Эсрэгээрээ ард түмний орлого багасч, халаас нимгэрсэн учраас эрх барьж байгаа нөхдүүдийг амраах хэрэгтэй гэсэн хандлагатай байна. Товчхон хэлбэл, орон нутгийн иргэд маань өнгөрсөн хугацаанд ардчиллыг их үгүйлсэн нь ажиглагдлаа. Тийм ч болохоор ардчилал, Ардчилсан намыг дэмжиж буйгаа илэрхийлсээр байгаа.
-Элдэв саад бэрхшээл гарч байна уу?
-Баруун бүсэд, тэр дундаа нэр дэвшиж байгаа бидэнд элдэв саад бэрхшээл гарсангүй ээ. Ард түмэн халуун дотноор хүлээн авч байна. Хүмүүс сонгуулийн уулзалтад цагтаа ирдэг болсон. Миний хувьд баруун бүсэд тог цахилгаан тасардаг, ОХУ-аас эрчим хүчний хараат байгаа байдлыг бүрэн зогсооно гэж байгаа. Иргэд ч үүнийг хүсч байна. Хоёрдугаарт, эрдэм мэдлэг, судалгаа шинжилгээн дээр суурилсан хөгжлийн төлөө явж байгаа миний зорилгыг ч таашаалтай хүлээж авсан.
-Ардчилсан нам баруун бүсэд ямар ажлууд хйихээр төлөвлөж, мөрийн хөтөлбөртөө оруулсан бэ?
-Манай намын зүгээс есөн зорилт тавьсан. Үүнд татварыг бууруулж, төсвийг танана. Ипотекийн зээлийн хүүг бууруулах, эрчим хүчний хараат байдлаас гарах, зуданд зутардаггүй “Чинээлэг малчин” хөтөлбөрийг хэрэгжүүлэхээр тусгасан. Мөн баруун бүсийн замыг сайжруулах, авлигын ялын бодлогыг гурав дахин чангаруулахаар мөрийн хөтөлбөрт оруулсан. Дээрээс нь миний хувьд Эрүүл мэнд-Эрдэм мэдлэг-Эрчим хүч гэсэн гурвалсан бодлогыг гаргаж тавьсан. Тулгын гурван чулуу шиг эдгээр бодлогыг хэрэгжүүлж чадах юм бол улс орон хурдацтай хөгжих, үйлдвэрлэл нэмэгдэх, аж үйлдвэрлэлийн хувьсгал хийх боломжтой болно. Үүнийг маань дэмжиж байгаа иргэд, сонгогчиддоо их баярлаж байна.
Т.ДАРХАН
Эх сурвалж: Өдрийн сонин
