Нийслэл өөрийн гэсэн хуультай болсноор бонд босгох боломж бүрдсэн. Энэ ажил Д.Сумъяабазарын үед эхэлж, Х.Нямбаатарын үед хэрэгжлээ.
Хоёр жил гаруй хугацаанд үргэлжилсний эцэст Нийслэлийн бонд гарч, анхны арилжааны цанг өчигдөр (2024.06.20) цохисон үйл явдал боллоо.
Эхний ээлжид Нийслэл 500 тэрбум төгрөг бондоос босгох юм байна.
Тэгвэл, “Сэлбэ дэд төв” тэргүүтэй гэр хорооллыг орон сууцжуулах төслийг Нийслэлийн бондоор санхүүжүүлэх төлөвлөгөөтэй байсан. Одоогоор Чингэлтэй, Сүхбаатар дүүргийн 500 гаруй айл газраа чөлөөлж өгөөд байгаа юм.
Газрыг чөлөөлөхдөө, тухайн айлын хөрөнгийг иргэнд ашигтайгаар үнэлэх хуулийн зохицуулалт бий болсон. Энэ дагуу иргэн нэг бол үнэлгээний дагуу хашаа, байшингаа төрд “зарна”. Эсвэл санал болгосон түрээсийн байранд амьдрах боломжтой. Оронд нь 2000 айлын орон сууц барина. Харин “Сэлбэ дэд төв”-ийн уг төсөл амжилттай хэрэгжвэл, цаашлаад хэд хэдэн орон сууцны хорооллын төсөлд шилжихээр байгаа.
Харин анхны арилжаагаар босгох санхүүжилтийг хараахан гэр хорооллыг орон сууцжуулах төсөлд зарцуулахгүй аж.
Нийслэлээс мэдээлснээр, төв цэвэрлэх байгууламжийн шинэ бүтээн байгуулалт болон авто зам, ус зайлуулах хоолойн шинэчлэлд зарцуулахаар шийджээ.
Яг нарийн төлөвлөгөө дурдвал, 27 байршилд 73.1 км зам тавих аж. Мөн түүнчлэн Төв цэвэрлэх байгууламж бүрэн ашиглалтад ороход бохир усны Туул-1 гол цуглуулагч шугамыг барьж дуусгах шаардлагатай юм байна. Үүнийг ашиглалтад оруулснаар Гачуурт, Улиастай, Налайх, Амгалан, Шархад, Дамбадаржаа, Баянхошуу, Толгойт болон Баянголын аманд шинээр баригдаж буй орон сууцны хорооллын бохир усыг цуглуулдаг болох аж.
Нийслэл метрог төсвийн хөрөнгөөр барихаар шийдвэрлэсэн нь анхаарал татсан. Харин гэр хорооллыг орон сууцжуулах “Сэлбэ дэд төв” төсөл шуурхай бөгөөд бодитой эхэлсэн. Гэвч санхүүжилтийг шийднэ хэмээж байсан Нийслэлийн бондын эхний арилжааг ийнхүү өөр чиглэлд зарцуулснаар, төсөл мөн хойшлох вий гэсэн болгоомжлолд хүргэж буй.
